يا صاحبي

[امينة خالد]

حييت يابو فلاح الطاري الزيني
حياك يا مرحبا .. مليون ترحيبه

اقلط على الطيبه يابن المياميني
غالي ولك بالحشا قدرٍ وتدري به

جتني علومك علي الوارد تناديني
والطيب ما كل رجلٍ يقدر يجيبه

أبيات شعرك .. تشيل الحمل وتجيني
أطلق عنان الأصيلة لا تثني به

قرب دلال المعاتب ثم .. قهويني
وافتح مضاريف شرهاتك بلا ريبه

لا تضرم النار في صدري وتكويني
ويأخذني الهم تشريقه وتغريبه

سود النوايا من الاصحاب تاذيني
ياما جنيت الاسى من زايد الطيبه

وانا احمد الله يوم الله معافيني
واللي سلك دربها بانت عذاريبه

شك بصدق الغلا ياصاحبي شيني
والظن لا شان : لا توديه وتجيبه

اقفت بي أسنيني اللي شيبت فيني
اسايس الوقت واجاهد مخاليبه

لطمات الأيام منها تدمع العيني
وتثني عزوم الرجال اللي لها هيبه

صاحبك ما بار ون تاهت عناويني
نبع الغلا بيننا صفيت مشاريبه

أنا وفــا عشرة الاجواد تثنــيني
ويبقى زبون المراجع ،، عند ظني به