رواية غابت شمسي وبدت رحلتي مع الظلام

[امينة خالد]

اشرقت الشمس على العاصمه الرياض وعم النور في كل مكان ولاكن مظلم في وجه بطل روايتي اســـامه .

فـي المحكمه ..
........: اش اسمك ؟
اسامه : اسامه عبدالله محمد الـ...
........: اسم زوجتك ؟
اسامه : نوف فهد محمد الـ...
.......: اش سبب الطلاق ؟
اسامه بغصه : لاني عقيم .
وكمل باقي الاجراءات وطلع للسياره ونزلت دمعته وهو يقود سيارته متوجهه للبيت " اش بتكون ردة فعلك يانوف اذا عرفتي اني طلقتك "
مسح دمعته " بس هذا اللي ربي كاتب لنا ولازم ترضى بالقدر ومو لازم تعرف اني عقيم "
وصل البيت ونزل وقلبه يقوله اللي سويته غلط وعقله يقوله هذا الصحيح وهو محتار وفتح الباب : سلام عليكم .
وقفت نوف وراحت له وبابتسامه : عليكم السلام هلا والله تو مانور البيت .. حبيبي اش فيك طالع من الشغل بدري ؟
اسامه وهو يجلس ع الكنبه : خويي مات اليوم ولازم اروح لعزاه .
نوف : ميـــن متعب ؟
اسامه : لا مو متعب .. واحد من الشرقيه .
نوف : الله يرحمه وانت بتروح لهم الحين ؟
اسامه : ايه لازم .. يله حبيـــ.. واستدرك كلمته .. روحي جهزي اغراضك وخذي كل شي لك لاني بغير البيت .. بس ملابسي اتركيهم .
نوف : لـــيش ؟
اسامه بحزن : ابي بيتنا قريب من بيت ابوي .
نوف بابتسامه : وليش ماقلت لي من زمان .
ابتسم اسامه مجامله لها : ابيها مفاجئه لك .
نوف : بس الحين بدري والبيت محتاج شوية تنظيف انت روح للشرقيه وانا اتصل على عامر يجي ياخذني .
اسامه : لا لازم انا اوصلك .
طلعت نوف لغرفتها واسامه يفكر فيها " ياربي ما اكون ظلمتها بس ان شاء الله القرار هذا هو الصح "
بغرفة نوف شالة كل ملابسها بالشنطه الكبيره " غريبه اسامه له ساعه من جا هنا ماتغزل فيني مو عاده له والبارح مو طبيعي ولا نام .. مصيري بعرف اش فيه "
لبست عبايتها ونزلت تحت : يله حبي انا جاهزه .
ابتسم لها اسامه وطلعو للسياره طالعة نوف باسامه : حبيبي اش فيك اليوم مو عاجبني مره .
اسامه : مافيني شي بس متأثر شوي بوفاة خويي .
وصلو بيت ابو عامر وطالعت نوف باسامه : راح اشتاق لك .
اسامه بحزن : وانا اكثر .
واخذ كيس احمر : هذي هديه مني .
اخذتها نوف وطقت الباب وفتحت الخدامه الباب وخذت الشنطه ودخلت نوف : سلام عليكم .
ام عامر وهي توقف : هلا وغلا ببنتي .
سلمت نوف عليها : اخبارك يمه ؟
ام عامر : الحمدلله بخير .
نوف : وين ابوي واخواني ؟
ام عامر وهي تجلس : ابوك بالشغل وعامر بغرفته نايم والعزوف بالمدرسه وماجد مع مهند بالبر .. إلا اسامه كيف جابك والله غريبه .
نوف : اسامه بيروح الشرقيه خويه مات الله يرحمه ولازم يوقف معاهم .
ام عامر : الله يرحمه .
رن جوال نوف : هلا عبير .
عبير: صباح الخير .
نوف : صباح النور .
عبير : نوف اش فيه اسامه مايرد على جواله ؟
نوف : والله ما ادري هو رايح الشرقيه .
عبير بفرح : يعني عادي تجلسين عندنا اكثر من يوم .
نوف : ان شاء الله .. اش فيــك فرحانه ؟
عبير : واخيرآ بنشوفك مو تقولين ما اقدر اعيش بدون اسامه .
نوف : اذكري الله .
عبير وهي تضحك : مشاء الله عليكم .


**

**

**

بالكوفي
متعب : لا اسامه تكفى لاتتغرب .
اسامه : اعذرني يامتعب انا لازم امشي قبل لاتعرف نوف اني طلقتها واتوقع انها قرأت الورقه .
متعب : اسامه الله يخليك لا تروح وتخلينا انا محتاجك وامك وابوك يبونك جنبهم انت ولدهم الكبير لاتخليهم .
اسامه وهو يوقف : انا اسف يامتعب ما اقدر على طلبك ومستحيل اجلس هنا .
متعب : وكم سنه بتجلس هناك ؟
اسامه : الين الله ياخذ امانته .
متعب : لااا اسامه طلبتك لاتسويها وتتركنا .
اسامه : متعب انا الحين مستعجل ولازم امشي .
متعب : والله لو قايل لنوف انك عقيم وهي تتصرف احسن .
اسامه : لا انا عارف رد نوف اكيد بتقول انا مستحيل اتخلى عنك هذي بنت عمي مستحيل انها بتتركني .
متعب : وانت ليش تركتها ؟
اسامه بغصه : مو بأختياري الامر هذا غصب عني .
متعب : والله عارف بس مو القرار الصح انك تروح ماقلت لهم .
اسامه : لا هذا القرار الصح .. مع السلامه انا لازم امشي .
وسلمو على بعض وضمو بعض : مع السلامه والله راح اشتاق لك .
تذكر اسامه كلمة نوف " راح اشتاق لك "
مشى اسامه من عند متعب وركب بالسياره وهو يفكر بنوف واش راح يصير لها " ياربي ما اكون سبب بتعاستها "


**

**

**

نوف : يمه انا بسوي الغداء .
ام عامر بابتسامه : بس انتي ضيفه .
نوف وهي توقف : لا انا مو ضيفه .
ام عامر : يعطيك العافيه .
دخلت نوف بالمطبخ وحضرت المقادير بمساعدة الخدامه وجلست ع الكرسي وقطعت السلطه " بتصل على اسامه اشوف وصل ولا لا "
وسوت الغداء ودخلت العزوف : نوووف .
نوف بابتسامه : هلا وغلا متى جيتي ؟
العزوف وهي تسلم على نوف : تو طلعت من المدرسه .. واخيرآ اسامه راح ع الاقل تجلسين عندنا كل يوم .
نوف : الله يخليه لي بس .
ابتسمت العزوف : ترا عيني مو قويه .
نوف بمزح : كلكم حاسديني عليه الله لايحرمني منه .
ابتسمت العزوف : امــين لو يموت ما ادري اش يصير لك .
فز قلب نوف وبخوف : اسم الله عليه .. جعل يومي قبل يومه .
العزوف : اسم الله عليك ماقلنا شي .
نوف : خذي الصحون ووزعيهم بصالة الطعام .
العزوف : طيب قولي لمالينا .
نوف : ابيها تشيل الصحن .
العزوف : اوك .. وخذت الصحون الزجاج وطلعت لصالة الطعام ورتبت الصحون على الطاوله .
دخلو ابو عامر وعامر وام عامر : سلام عليكم .
العزوف ونوف : عليكم السلام .
ابو عامر : تو مانور البيت .
ابتسمت نوف : منور بوجودك .
العزوف : يبه انا بنتك الغاليه واخر العنقود .
ابو عامر بمزح : خلينا ع الاقل نجاملها .
عامر : وانا ولدكم الكبير على الهامش .
ام عامر بابتسامه : انت حبيب قلبي واغلى البشر عندي .
عامر بينرفز العزوف : سمعتي يا اخر العنقود .
العزوف : اقول بس اسكت يادلوع الماما .
ابو عامر : لو تجيبين 100 ولد مايجون اغلى من العزوف .


**

**

**

وصل بعد مشقة الطريق والعنا ونزل وسلم على مشاري : يعطيك العافيه مشاري ما ادري اشلون ارد لك جزاك .
مشاري : هذا حق وواجب يا اسامه واخوي متعب قالي ضروفك الله معك ولو ما انت ثقه كان ما دخلتك الامارات بدون اجراءات .
اسامه : انا مو رايح إلا عشان دراستي وابعد عن اهلي ع الاقل سنه او سنتين .
مشاري : الله يفرج همك ويوفقك بكل خطوه تخطيها ويحقق كل اللي فبالك .
اسامه : مشكور والله جميلك هذا ما راح انساه طول عمري .
مشاري : ولو هذا حق وواجب وانت خوي اخوي وما اقدر اردك .
اسامه : مع السلامه مابقى على رحلتي إلا ساعتين بروح ارتاح .
مشاري : مع السلامه ونشوفك على خير ان شاء الله .
ركب اسامه بالسياره ودخل دبي على غروب الشمس ووصل للفندق ونزل وصعد بالمصعد لجناحه ودخل وخلع جاكيته ورماه ع الارض وتمدد على الكنبه " يارب تسعد نوف وتوفقها "
جاله نص ساعه وهو يحاول ينام بس جافاه النوم وحس اسامه انه مخنوق ومحتاج هوا وقام وطلع للبلكونه واستنشق الهوا البارد وبدت قطرات المطر الصغيره تهطل بخفه واسامه يتمنى لو المطر يغسل عقله وقلبه ويصير مثل الطفل اللي تو طلع على الدنيا بدون هموم ولا حب ولا عذاب
ابتسم اسامه بوجع وهو يتذكر اول ايام عيد الاضحى قبل 10 ايام .
جات نوف وجلست جنبه : احبكـ .
ابتسم لها اسامه : وانا اكثر .
نوف : اسامه لو نتفرق اش راح يصير لك .
اسامه بخوف : الله لايقوله .. اش فيك انهبلتي ؟
نوف : اسامه اتكلم جد لو نفترق اش تسوي ؟
اسامه : اتوقع اقل شي اسويه انتحر والله حياتي بدونك ماتسوى .
نوف وهي تبوس خده : الله يخليك لي ولايحرمني منك .
اسامه بعد ما باس يدها : ولا منك يالغلا .
وبدا رذاذ المطر بالهطول ابتسمت نوف : الجو اليوم يهبل .
اسامه وهو يمسح على شعرها : بس مو احلى منك .
رجع لواقعه المؤلم والمظلم وهو يسمع صوت جواله يرن : هلا يامتعب .
متعب : هلا بك اش اخبارك ووصلت دبي ولا لا ؟
اسامه : ايه وصلت تقريبآ من ساعه .
متعب : الله يكون بعونك شكلك اليوم ما ارتحت ولا ساعه .
اسامه بحزن : اشلون تبيني ارتاح وانا مطلق نوف والله من البارح مو قادر ارقد مع انها جنبي وقريبه مني بس عجزت انام .
متعب : الله يعينك يارب .
اسامه : ما تدري نوف اس صار فيها ؟
متعب : لا بس ما اظن انهم عرفو انك طلقتها .
اسامه : راح تعرف بس تكفى طمني عنها اول بأول .
متعب : من عيوني .. اسامه والله مو عذر تتغرب وتطلق زوجتك عشانك قاصر .
اسامه : متعب انا ما ابي نوف تنظر لي بنظرة شفقه انا ابيها تكرهني عشان تشوف نصيبها مع غيري .
متعب : لو نوف تزوجت انت بتزعل .
اسامه : متعب لاتقول كذا ان شاء الله نوف بتصير لغيري .
متعب : طيب ليش مطلقها وانت ماتبيها تروح لأحد غيرك البنت اكيد بتشوف نصيبها مو موقفه حياتها عشانك .
اسامه : الله يكتب لها الخير ويوفقها والمكتوب على الجبين بتشوفه العين .
متعب : ايه هذا صاحبي اللي اعرف .
اسامه : مع السلامه متعب بفى نص ساعه على رحلتي اتصل عليك اذا وصلت المانيا .
متعب : الله معاك ياصاحبي وتوصل بالسلامه ان شاء الله .

**

**

**
عند نوف لسه ماوصلها الخبر ولا عرفت ان اسامه طلقها .
دخلت نوف بغرفتها وجلست ع السرير دخلت الخدامه : ماما انا برتب غرفه فيه غبار .
ابتسمت نوف : اوك رتبيها .
خذت نوف الكيس الاحمر هديتها من اسامه وفتحته وشافت علبة سلسال مزينه بورد احمر فتحتها وخذت السلسال الالماس مكتوب عليه اسامه بالانقليزي اعتلت جسمها قشعريره وهي تشوف جوال اسامه وورقتين لونهم ابيض وورقة دفتر طلعتهم وقرأت الورقه مكتوب فيها ( انتي حبي الاول والاخير حبيبتي سامحيني ) حست ان الموضوع كبير واكبر منها " اسامه اكيد فيه شي " فتحت الورقه وقرأتها وصرخت : لااااااا.
طالعتها الخدامه اللي كانت تمسح التسريحه : ماااااماااا .. ماااامااا .
ونزلت تحت تركض مثل المجنون : ماااماا .
جا عامر : نعم نعم اش فيك ؟
الخدامه وهي ترجف : ماما نوف في موت .
راح عامر يركض لغرفة نوف وشافها طايحه على الارض وبيدها ورقه وقرأها بصدمه : لا لا مستحيل مو مصدق .
اخذ عباية نوف ورماها عليها وشالها وطلع للسياره وركبها وراء وركب بالسياره وتوجه للمستشفى بسرعه جنونيه وصل الطوارئ ونزلو نوف من السياره ودخلوها بالغرفه وبعد مرور نص ساعه طلعت الدكتوره السعوديه وراح لها عامر : نوف اش صار لها ؟
الدكتوره : تعرضت لصدمه نفسيه وحالتها جدآ سيئه هي اش حصل لها بالضبط ؟
عامر : طلقها زوجها وهي مصدومه .
الدكتوره : ياليت تخلون اسامه يجي لأنه هو الوحيد اللي يقدر يحل عقدتها هي تعبانه حيل ومحتاجته وتناديه باستمرار .
عامر : واذا ما جاء اش الحل ؟
الدكتوره : والله مو عارفه اش بيصير لها بس هي حالتها جدآ سيئه .
عامر : وكم يوم تجلس هنا ؟
الدكتوره : احتمال اسبوع اذا تحسنت حالتها .
عامر : الله كريم .. ودخل عند نوف وشافها مسنده ظهرها على السرير وتبكي : الحمدلله على سلامتك .
نوف وهي تبكي : ليش طلقني اسامه ؟
عامر : والله مو عارف اش السالفه انتم اش صار بينكم قبل لايروح الشرقيه ؟
نوف وهي تتذكر : والله من زواجنا ماصارت ولا مشكله بيني وبينه وانا مصدومه انه طلقني .
عامر : حسبي الله عليه .
نوف بعصبيه : عااامر لاتتحسب عليه هو ماسوا لك شي واحترم نفسك ولا تغلط عليه .
عامر : مايصير بخاطرك إلا طيب .. الحين بتصل على اسامه اشوف اش السالفه .
نوف وهي تمسح دموعها : جـ جواله عندي .
عامر : اش جاب جواله عندك ؟
نوف بين شهقاتها : ما ادري بس هو اعطاني هديه وفيها جواله .
عامر وهو يمسح على شعرها : خلاص يانوف لاتبكين والله مايسوى دمعه من عينك .
نوف : حرام عليك هذا ولد عمك .
عامر : طاح من عيني من يوم طلقك .

دخل متعب البيت : سلام عليكم .
ام مشاري : عليكم السلام هلا وغلا .
متعب وهو يجلس على الكنبه وبتعب : يمه ام اسامه كلمتك ؟
ام مشاري : لا .. ليش فيهم شي ؟
متعب بابتسامه مصطنعه : لا مافيهم شي بس من زمان مارحتي لها ولا اتصلتي عليها .
ام مشاري : احنا متواصلات مع بعض وانا وام اسامه صاحبات من ايام المراهقه .
متعب : الله يخليكم لبعض .
ام مشاري : غريبه راجع هالوقت ليش اسامه صاير فيه شي ؟
متعب : لا الحمدلله مافيه شي بس هو عنده زوجه وبيت ولازم يرجع للبيت الساعه 6 ونص .
ام مشاري : وليش مو كل يوم عنده زوجه وبيت .. متعب انا حاسسه ان الموضوع فيه شي .
متعب : لا يمه مافيه ولا شي بس انه اليوم حب يرجع لبيته وانا مستحي من الرجال مو قايل له اجلس معاي .
ام مشاري : الله يوفقكم ويرزقكم ويفتحها بوجهكم .
متعب " آآآآآه يايمه لو تعرفين اش اللي بصدري " اخذ الريموت ( الكنترول ) وشغل التيفي وحطه على القناه الأخباريه .
كانت ام مشاري تتابع التلفزيون مع ولدها : الله ينصر سوريا والله من اشوفهم احس انه عيالي اللي يقتلون .
متعب : ان الله يمهل ولا يهمل والطاغيه بشار راح يشوف بأذن الله عجايب قدرة ربي .
ام مشاري : حسبي الله عليه .
متعب : يمه اهل سوريا محتاجين دعواتنا لهم .
ام مشاري : يعلم الله انه بصلاتي وبوقت فراغي ادعي ان الله يفرج كربتهم .

**

**

**

ام عامر مو مصدقه اللي تسمعه : انت متأكد من كلامك اسامه طلق نوف ؟
عامر : يمه نوف الحين بالمستشفى والدكتوره تقول محتاجه لأسامه كثير .
ام عامر : بنتي تدخل المستشفى وانا اخر من يعلم وسألت العزوف قالت نوف بغرفتها .
عامر : يمه احنا خفنا عليك وقلنا نأجل الموضوع الين تهدى نوف ونقولك .
ام عامر : اشلون تهدى نوف واسامه بعيد عنها هذي يمكن تموت لو اسامه مايرجع لها .
عامر : لا يمه اسامه لو حاول يرجع نوف راح اقتله .
ام عامر بعصبيه : احنا وين وانت وين وهذا ولد عمك وعمر الظفر ماطلع من اللحم واسامه اكيد صاير فيه شي وانا متأكده .
عامر : طيب اهل عمي عرفو ان اسامه طلق نوف ؟
ام عامر : والله ما ادري الحين اكلم نوره واسألها اذا اسامه عندهم ولا لا .
اتصلت ام عامر على ام اسامه : الوو .
ام اسامه : اهلين .. مساء الخير .
ام عامر : مساء النور .. اخباركم ؟
ام اسامه : الحمدلله بخير اش اخباركم ؟
ام عامر : الحمدلله على كل حال .. إلا بسألك يانوره اسامه مر عليكم اليوم ؟
ام اسامه مستغربه : لا هو بالعاده يجي العصر اليوم ما جاء .
ام عامر مو عارفه اشلون تقول لها : ياليت اذا جاكم تقولون له يمر هو طلق نــوف واحنا ماندري اش اللي حصل بينهم .
ام اسامه بصدمه : ايــــش اسامه يطلق نوف .. لا لا مو مصدقه اكيد هذي من مقالبك .
ام عامر : ياليت مقلب هذي حقيقه يا ام اسامه .
ام اسامه وهي تبكي : بعد عمري نوف اش صار لها ؟
ام عامر : هي بالمستشفى والدكتوره تقول اذا ماشافت اسامه وكلمته وجلست معاه احتمال تبقى طول عمرها حزينه .
ام اسامه : وهو وينه فيه ؟
ام عامر : ما ادري والله اتصلت عليك اسأل عنه وعامر راح لبيت اسامه وماحصله .
ام اسامه : الله يستر .. عين ماصلت على النبي اسامه ونوف من صغرهم يحبون بعض اشلون يطلقها ؟
ام عامر : صدمتك مو اكبر من صدمتي .
ام اسامه : ونوف بأي مستشفى ؟
ام عامر : بمستشفى ....
ام اسامه : مع السلامه حبيبتي والله يكون بعوننا راح نتعب مع هالعيال .
ام عامر : مع السلامه .

**

**

**

الماس : والله مايقهرني إلا جدتي إذا مدحت نوف احس الدنيا عندي تصير اصغر من ثقب ابره .
ليلى : وانتي اش عليك منهم ؟
الماس بقهر : نوف الحقيره تاخذ اسامه مني ليش الدنيا فوضى اسامه لي ان قصر الزمن ولا طال .
ليلى ببرود : كل واحد يفكر على قده وانتي ابني طموحك على قدك ولاتحاولين ان اسامه بيتخلى عن نوف عشانك .
الماس : انا بنت عمه مثل مانوف بنت عمه انا حلوه اش ينقصني عنها ؟
ليلى : ياحبيبتي الحب مو على الشكل والزين من زانة اطباعه ونوف احلى منك وبإشادة الكل .
الماس بصراخ : خلااااص اسكتي لاعاد اسمع حسك .
ليلى : بليز اسكتي شوي عبود يتصل علي .
الماس : وانتي هذا همك ؟
ليلى بسخريه : لا همي همك .. يعني اش بيهمني غيره .
الماس : آآه بس لو وليد يدري كان ذبحك .
ليلى : ههههههه يذبحني وعبودي موجود ؟
الماس : والله بيجي يوم تندمين قد شعرك انك حبيته وهو كذاااب والله كذاااب مايحبك .
ليلى : لا يحبني .. وردت عليه بعد ما اتصل مره ثانيه : هلا حبي .
عبدالله : هلا وغلا وسلة حلا بحلا عمري .
ليلى : اخبارك حبيبي ؟
تنهد عبدالله : آآه فديتك بس .
ليلى وهي تطلع من غرفة الماس متوجهه لغرفتها : امك اش اخبارها ؟
عبدالله : الحمدلله تمام .
دخلت ليلى بغرفتها وسكرت الباب وتمددت ع السرير : عبودي والله احبك .
عبدالله : وانا اكثر ... هاا حبي متى نتقابل ؟
خافت ليلى : لا عبودي والله خايفه .
عبدالله بزعل : خايفه مني ياليلى انا عبدالله حبيبك تخافين مني خلاص اذا انتي كذا انا اسف ما اقدر ارتبط معاك .
ليلى مايهون عليها عبدالله : حبيبي لاتزعل علي والله اللي تبيه بيصير بس اعطني فرصه .
عبدالله : الاربعاء اخر يوم انا اعطيتك فرصه من شهر .
ليلى : حاضر حبيبي نتقابل الاربعاء .
عبدالله : يعني بس يومين واشوفك ؟
ليلى : ان شاء الله .
عبدالله : فديت ليلى ياناس ماترد لي طلب .

**

**

**

ابو اسامه : ايش طلق نوف ؟
ام اسامه : ايه .
ابو اسامه : نوف الغاليه تنجرح من اقرب الناس لي والله ما اخليه .
ام اسامه وهي تبكي : ولدك مايندرى وين ارضه من سماه وجواله عند نوف .
ابو اسامه : لعبها صح واكيد بيختفي ايام ويجي بس والله لأوريه .
ام اسامه : حرام عليك احنا مو عارفين اش ضروف الولد .
ابو اسامه : هذا ماعنده ظروف بس اكيد الماس مسببه له مشاكل .
ام اسامه : الماس من يومها ماتستحي ودايم تروح لبيت نوف وتتهاوش معاها وتقل ادبها مع اسامه بس ماصارت بينهم مشاكل ولا هزت شعره من راس اسامه يعني تو يتذكر ويطلق نوف .
ابو اسامه : والله تو اعرف ان اخوي عبدالعزيز مضيع بناته .
ام اسامه : الله يهديم مثل امهم اعرفها من صغرها وهي كذا .
ابو اسامه : وانا ما ادري اش اللي خلى عبدالعزيز يتزوجها .
ام اسامه : المهم ولدك وينه الحين قال انه رايح الشرقيه وجواله مع نوف يعني احتمال ماطلع من الرياض .
ابو اسامه : اتصلي على اخوك محمد .. متعب يقول ان اسامه يوم كانو بالشرقيه قال انه رايح لخاله محمد .
اخذت ام اسامه جوالها واتصلت على محمد : الو .
محمد : هلا نوره .
ام اسامه : اسامه اليوم اتصل عليك او راح لك بالبيت ؟
محمد : لا والله ماشفته ليش هو بالشرقيه ؟
ام اسامه وهي تبكي : والله ما ادري وينه طلق نوف واختفى ماندري وينه ؟
محمد : ايـش طلق نوف ؟
ام اسامه : ايه .. تكفى اذا عرفت عن ولدي اي شي بلغني .
محمد : حاضر .. مع السلامه .
ام اسامه : مع السلامه .
ابو اسامه : لايكون اسامه متورط مع عصابه او بالسجن .
ام اسامه : لا تتفاول على ولدي اسم الله عليه .

**

**

**

ام وليد : هههههههههه اسامه طلق نوف .
ابو وليد بعصبيه : على ايش تضحكين ؟
ام وليد : هههه مو مصدقه واخيرآ طلقها .
ابو وليد : انتي وين واحنا وين ولد اخوي اسامه اختفى كأن الارض انشقت وبلعته ماله اثر .
ام وليد : هههههه بعد ضايع واخيرآ جاتهم مصيبه .
طلع من عندها ابو وليد ونادت ام وليد بنتها الماس وجات الماس : هلا يمه .
ام وليد بابتسامه : ابشرك اسامه طلق نوف .
صرخت الماس وحضنة امها : الله يبشرك بالخير واخيرآ .
ام وليد : ان شاء الله بيخطبك انتي بنت عمه واكيد انه حبك واخيرآ حس فيك .
الماس : والله ما اخلي الجو يصفى لـ نوف .
ام وليد بابتسامه وفخر ببنتها : كفو هذا العشم فيك .
الماس : تربيتك يالغاليه .
ام وليد : آآآه متى يجي اليوم اللي اشوف نوف فيه جثه مالها لاحول ولا قوه وانتي زوجة اسامه .
الماس : يمه والله من زمان مافرحت كثر فرحتي الحين اش رايك نسوي حفله بسيطه ونعزم بنات خالتي .
ام وليد : خذي راحتك ياقلبي .
دخل وليد : سلام عليكم .
ام وليد : عليكم السلام .
جلس وليد ع الكنبه : الماس روحي جيبي لي ماء بارد .
راحت الماس وجابت له كوب ماء : اخذ .
وليد : شكرآ .
الماس بابتسامه : عفوا .. وليد حبيبي ممكن طلب .
وليد : اذا اقدر عليه .
الماس : ابيك تجيب لي كيكه حلوه من الاوركيد .
وليد : ممكن اعرف اش سر سعادتك اليوم ؟
الماس : جعلها اليوم ودوم .
وليد : الماااس انتي مو عاده لك الفرح .
ام وليد : حاسد اختك ؟ هي فرحانه عشان نتايجها طلعت وبكل المواد ماخذها a بلس .
وليد بعدم تصدق : مشاء الله ماخذه بكل المواد a بلس .. ليش نزل عليك الوحي فجأه .
الماس : ايه ليش مو عاجبك .
وليد وهو يوقف : الله يهنيك بنتيجتك .
الماس : هااا تروح تجيب لي كيكه .
وليد : لااا .. اش تحتفلين عليه ولد عمك مختفي ماندري وين راح ونوف طريحة فراش وتعبانه .
الماس : اووووف الى متى واحنا موقفين حياتنا عشان نوف .
وليد : الماس لاتفرحين على مصايب الناس ترا يبلاك ربي بمصيبه اكبر .
الماس : الحمدلله انا مو ظالمه عشان تصيبني مصيبه .
وليد : ليتك بس ظالمه .


**

**

**

بالمستشفى .

نوف وهي تبكي بحضن امها : يمه اسامه وين راح ليش خلاني ؟
ام عامر وهي تبوس ايد نوف : خلاص يابعد عمري لاتبكين والله قطعتي قلبي واسامه ماراح يخليك .
نوف : طيب ليش طلقني والله ما اقدر اكمل حياتي بدونه اسامه المحرك لحياتي شمس حياتي الدنيا بعده مظلمه .
ام عامر بتهديها : حبيبتي اكيد ظروفه ماتسمح له يكمل حياته معك .
نوف : يمه من البارح وهو مو طبيعي احس فيه شي مكدر خاطره واليوم الصبح جا وقالي انه بيروح عزا خويه يعني كل اللي سواه بس عشان مايجرحني يمه انا ما اقدر اعيش بدونه اسامه حياتي كلها تكفون رجعوه لي انا متقبلته بكل مافيه من عيوب وعمري ماشفت منه عيب .
دخلت ام اسامه : سلام عليكم .
نوف وامها : عليكم السلام .
ام اسامه وهي تبوس راس نوف : الحمدلله على سلامتك حبيبتي .
نوف وهي تبكي : عمتي اسامه وينه ؟
ام اسامه وهي تمسح دموع نوف : لاتبكين يا قلبي والله دموعك غاليه علي .
ام عامر : والله من يوم عرفت ان اسامه طلقها ودموعها ماجفت .
ام اسامه : عشان خاطري وخاطر امك لاتبكين حياتك مو موقفه عشانه .
نوف : إلا الحياه بتوقف بدونه حياتي ولا شي بدون اسامه قبل زواجنا كنت اكلمه بالجوال يعني كل حياتي معاه .
ام اسامه : يارب تقر عيوننا بشوفته انا مـتأكده ان ولدي فيه شي .
نوف : عمتي تكفين اذا عرفتي شي عن اسامه قولي لي .
ام اسامه : من عيوني بس احنا مانعرف عنه اي شي وبكلم متعب يمكن يعرف عنه شي .
نوف : ايه متعب يعرف كل شي عن اسامه .


**

**

**

مهند : هلا يبه .
ابو اسامه : انت وينك ؟
مهند : انا بالبر مع ماجد .
ابو اسامه : اخوك اسامه مختفي الارض انشقت وبلعته واحنا محتاجينك تعال .
مهند بخوف : ليش يبه اش فيه ؟
ابو اسامه : طلق نوف وماندري وين راح .
مهند : ايـــش طلق نوف .. ليش اش صاير ؟
ابو اسامه : والله مو عارفين شي تعال عشان ندور على اسامه احنا بلغنا الشرطه وعممو على مناطق السعوديه كلها .
مهند : اوك الحين جاي .. مع السلامه .
ابو اسامه : مع السلامه .
وقف ماجد وبخوف : اش صاير ؟
مهند : ابوي يقول اسامه طلق نوف ومايعرفون وين راح .
ماجد : يله بسرعه بنمشي .
مهند : يله قول للشباب ان عندنا ظروف انا بروح اشغل السياره واشيل الاغراض .
راح ماجد للشباب اللي جالسين بالمخيم : سلام عليكم .
الكل : عليكم السلام .
ماجد وهو يفرك يدينه وبتوتر : انا ومهند لازم نمشي الحين صار لنا ظرف طارئ ولازم نمشي .
وقف بندر : سلامات اش صاير ؟
ماجد : ولد عمي اسامه مايدرون وين راح .
بندر : بنروح معاكم يمكن نحصله .
ماجد : لا لا انتم خلوكم هنا احنا نكفي وفيه ظروف خاصه صارت بالعايله ضروري نمشي .
بندر : الله معاكم .
مهدي : طمنونا عن اسامه .
ابراهيم : الله يوفقكم والله الجلسه بدونكم ماتسوى .
سلم ماجد عليهم وطلع وركب بسيارة مهند fj لونها ابيض : عين ماصلت على النبي .
مهند : انا حاسس ان الماس بنت عمي لها يد بالموضوع .
ماجد : لا لا بنت عمي مو بهالدناءه .
مهند : لا الماس تحب اسامه وياكثر ماتقول الكلمه هذي قدام اسامه واكيد انها ساحرته .

**

**

**

بالديار البعيده .. بديار الغربه .. الشوق له مكان .. والدمع والفراق .. كان اسامه يمشي على الشاطئ بدون هدف ويبكي على فراق حبيبته نوف .
جلس ع الكرسي " بعد عمري يانوف اش صار لها "
جا شاب عربي وجلس جنب اسامه : سلام عليكم .
مسح اسامه دموعه : عليكم السلام .
اصيل : شو بك تبكي كتير ؟
اسامه بصوت مبحوح من التعب والبكا : جاي ادرس هنا واشتقت لأهلي .
اصيل : من حقك اخي كلنا بنشتآ لآهلنا بس انت بتبكي كتير .
اسامه : فيه ظروف حصلت لي وهي مأثره علي شوي .
اصيل : انت من الخليج صح ؟
اسامه : ايه انا اسامه من السعوديه .. وانت .
اصيل : انا اصيل من سوريا .
اسامه بابتسامه مصطنعه : هلا والله بأهل سوريا .
اصيل : اخي شو بك والله احس انت حزين .
اسامه : خلها على الله بس .
ابتسم اصيل : شو رأيك تمشي معي ع السكن عشان تتعرف ع الشباب .
اسامه : لا ما ابي اتعرف على احد انا ما احب اختلط بالناس .
اصيل : انت اكيد بك شي مو طبيعي .
اسامه : قلت لك ظروف صعبه خلتني اجي هنا .
اصيل : انا حاولت اسلي خاطرك واخليك تمشي معايا بس انت مابدك .
اسامه : اذا فيه احد من السعوديه اروح معاك .
اصيل : اخي شو بك كلهن من العرب وفيه سعودي وقطري ومغربي .
اسامه وهو يوقف : يله نروح لهم .
راحو للشباب اللي جالسين ع الكراسي والسوالف والضحك عامر بينهم .
اصيل : ياشباب انا جبتلكن صديق جديد من السعوديه .. هذا اخوكن اسامه بدي اعرفك عليهن يوسف من السعوديه .
يوسف : هلا والله بابن جلدتي تو مانورت المانيا .
سلم عليه اسامه وكأنه واحد من اخوانه : هلا بك زود والله يوم شفتك كأني شايف احد من اهلي .
يوسف : والله حسيت انك اخوي مو واحد اول مره اقابله .
اصيل : هذا حمد من قطر .
سلم عليه اسامه وسلم على كريم من المغرب : لي الشرف اني اتعرف على ناس مثلكم .
يوسف : الشرف لنا .. انت من اي منطقه ؟
اسامه : من الرياض وانت ؟
يوسف : انا من المدينه .
رن جوال اسامه ووقف : عن اذنكم .. هلا وغلا .
متعب : هلا والله بالغالي اخبارك ؟
اسامه : حالي كل ماله وهو يتردى .
متعب بحزن : اسامه ارجع ماراح يفيدك تغربك وبعدك عن اهلك .
اسامه : اتغرب وابعد عن اهلي اهون من اني اشوف واسمع اني جرحت نوف .. إلا نوف اش اخبارها ؟
متعب : والله نوف محتاجتك وهي الحين بالمستشفى .
اسامه بخوف وهو يحس ان رجوله ماعادت تشيله : اش فيها ؟
متعب : من عمايلك ارحم نوف وارجع عامر كلمني ويقول الاطباء يقولون انه اذا مارجعت لها وهي ماشافتك راح تبقى حزينه .
زادت رجفة اسامه والخبر كان له مثل الصاعقه ..

**

**

**

طلعو العزوف وامها وماجد من غرفة نوف وبقت بروحها وسالت دمعتها ويليها سيل من الدموع دخلت بنوبة بكاء مو طبيعيه مرت ساعتين وهي تبكي وكان هناك مراقب لها طلعت نوف صورة اسامه اللي تحت المخده طلبت من امها تجيبها لها ومارفضت لها طلب باست صورة اسامه
وخذت القلم اللي ع الطاوله وقلبت الصوره وكتبت
تضيق فيني دنيتي واتعنا
ويزيد حزني لا طرى اليوم طاري
كنت احلم بقربه وكنت اتمنا
واليوم عني راح وعجزت الاقيه
ياصاحبي اعذر خفوقن تعنا
من بعدكم باقي الالم في حياته
قدرك عزيز وبعد فقدك عرفته
يارب عيد الوصل باللي احبه
احن للماضي وروعة سنينه
واذكر حياتي في وصاله وقربه
والله ما انسى ولا يمكن انسا
ايامه الحلوه معي او لياليه

الشاعر : ابراهيم حكمي

دخل ابو عامر بعد ماطق الباب : سلام عليكم .
نوف وهي تمسح دموعها : عليك السلام .
باس ابو عامر راسها : صباح الخير .
نوف : صباح النور .
مسح ابوها على راسها : يابنتي حرام اللي تسوينه بنفسك لاتبكين .
نوف : يبه اش اسوي غصب عني انا محتاجه اسامه .
ابو عامر : انتي كل حزنك مو عشان اسامه طلقك عشان غيابه ؟
هزت نوف راسها بإيه .
ابو عامر وهو يبوس راسها : حبيبتي انا بروح الشغل الحين اذا احتجتي شي اتصلي علي .
نوف : اوك .
طلع ابوها وسندت نوف راسها على السرير وهي تبكي " يارب تحفظ اسامه وين ماكان "
رن جوالها وشافت الرقم من خارج الدوله وردت بـ : الوو .
اسامه : ..................
نوف وهي تبكي : الووو .. الوو .
اسامه وهو يسمع لشهقاتها وبكاها يحس انه نار تشتعل بصدره : .......
سكرت نوف الخط وقفلت جوالها .

**

**

**

ام اسامه : يعني اشلون مايعرفون عنه شي .
مهند : يمه لهم ثلاث ايام يبحثون عنه ماحصلوه بالجوازات وبالسجون وبكل مكان ماحصلوه .
ام اسامه : ياربي هذا وين راح حتى متعب لما كلمته يقول اخر مره شافه لما كانو بالشرقيه .
مهند : يمه انا شاك بالسالفه متعب واسامه ماطلعو من الرياض .
ام اسامه : انت تدري عن احد ؟ كل وقتك بالبر او عند جدتك بالديره .
مهند : يمه والله اتكلم جد اسامه الصبح قايل لنوف انه رايح الدمام والعصر وانا شايف متعب .
ام اسامه : والله ماقطع قلبي إلا نوف .
مهند : الله يكون بعونها .
جات سعاد : سلام عليكم .
ام اسامه : عليكم السلام .
سعاد : يمه نوف اش فيها ماعادت نوف اللي اعرفها تغيرت حيل .
ام اسامه : بسم الله الرحمن الرحيم اول شي اجلسي وبعدين اسألي .
سعاد : يمه والله نوف تغيرت احس انها كرهت الناس كلهم .
ام اسامه : نوف مجروحه من اسامه ومن عمايله فيها اشلون يطلقها كذا ويختفي .
سعاد : قبل شوي كنا عندها انا والعزوف كل وقتها تبكي نمزح معاها مو معبرتنا .
مهند : والله انكم فاضيات البنت بالمستشفى وانتم رايحين تستهبلون عندها .
سعاد : اش نسوي نحاول انها تضحك لو بس مره خلاص اختفت ابتسامتها طول وقتها تبكي .
ام اسامه : الله يصبرها ويقومها بالسلامه والله ما ادري اش اسوي ودي اسعدها بس مابيدي حيله .
رن جوال سعاد : الوو .
الماس : هلا وغلا ببنت عمي .
سعاد : انتي مين ؟
الماس : معقوله يا سعاد ماتعرفيني انا الماس بنت عمك .
سعاد بحقد وكره : نعم اش بغيتي ؟
الماس : كذا تكلمين اللي يتصلون عليك ويتطمنون عليك .
سعاد بعصبيه : الماس انا وانتي بيننا الرسميات وبس صح انك بنت عمي وعمر الظفر ماطلع من اللحم بس خلاص علاقتنا ببعض انتهت من زمان.
الماس : اناا بقولك كلمتين ابيك توصلينهم لنوف .. اسامه لي ان طال الزمن وان قصر .
سعاد : اسامه مو لك ولا لنوف اسامه اختفى ماندري هو ميت ولا عايش .
الماس : انا السبب بطلاقهم انا قلت لأسامه اني احبه وهو من زمان يحبني بس مايبي يحرج ابوه مع عمي فهد .
سعاد : انتي كذابه وياويلك ثاني مره تتصلين علي خلاص انا ما ابيك انت ايش ماعندك كرامه ؟
الماس : لاتكلمين علي وانتي اللي ماعندك كرامه مو انا .
سعاد : والله انا ما رحت للناس اللي مايبوني ولا اتصلت عليهم .
الماس : والله لأخليك تندمين على كلامك .
سعاد : اذا انتي قدها سوي لي شي .
الماس : انا قدها وشوفي بس شهر وراح تشوفون المصيبه الثانيه .
سعاد : لعلمك مو انتي اللي تنزلين المصايب ربي اللي يبلانا فيها جعلك للمصيبه ان شاء الله .

**

مر اسبوع من طلاق نوف واليوم تطلع من المستشفى كانت جالسه ع السرير وتبكي دخلت امها : يله يانوف قومي البسي عبايتك .
وقفت نوف : يمه لسه ماحصلو اسامه ؟
ام عامر : لا حبيبتي مافيه احد يعرف عنه شي .
لبست نوف عبايتها ولفت طرحتها وتغطت بطرفها وطلعت مع امها للسياره وركبت نوف وراء : سلام عليكم .
عامر : وعليكم السلام .. الحمدلله على السلامه نورت الرياض بقومتك بالسلامه .
نوف : منوره بوجودك .
ام عامر : اخوانك مسوين لك مفاجئه .
ابتسمت نوف " انا وين وانتم وين " : مشكورين ياقلبي .
عامر : ترا انا صاحب الفكره واللي تنفذ العزوف .
نوف : بعد عمري الله يخليكم لي .
رن جوال نوف وكان المتصل من خارج الدوله حطته سايلنت ورجعته بالشنطه .
وصلو البيت ونزلو ودخلت نوف وكان قدامهم شريطه والمقص على الطاوله ومزين بورود والصاله كل اضاءاتها بشموع وفيه كيكه ع الطاوله مكتوب فيها الحمدلله على سلامتك يانوف ابتسمت نوف مجامله لعامر : مشكور ياقلبي الله لايحرمني منك .
عامر : العفو والبيت تو نور بصراحه حياتنا من يوم دخلتي المستشفى وهي منقلبه راسآ على عقب .
نزلت العزوف مع الدرج وراحت تركض لنوف وحضنتها : تو مانور البيت الحمدلله على سلامتك ياقلبي .
نوف : الله يسلمك .. يمه وين جدتي لها يومين ماجتني ؟
ام عامر بابتسامه : جدتك عند ابوك وعمك بالديوانيه .
نوف : عن اذنكم بروح اغير ملابسي .
ام عامر : اذنك معاك .
راحت نوف لغرفتها وفتحت الباب وشافت جوال اسامه على الكومدينو والاوراق ع السرير ونزلت عبايتها وعلقتها بالشماعه وشالت الاوراق بالكيس ودخلتهم بدرج الكومدينو وخذت جوال اسامه ودخلته بالدرج وصورة اسامه حطتها تحت المخده .
وخذت لها شور ولبست بنطلون اسود وبلوزه هاي نك اسود وخذت البالطو الابيض ولبسته وجففت شعرها ونزلت تحت وراحت للديوانيه ودخلت : سلام عليكم .
وقف ابوها وعمها : عليكم السلام .
ابو اسامه : هلا والله بالغاليه الحمدلله على سلامتك .
نوف : الله يسلمك .
وسلمت عليهم وراحت لجدتها : هلا هلا والله بالغاليه الحمدلله على سلامتك .
نوف بعد ماباست راس جدتها ويدها : الله يسلمك يالغاليه .
ام عبدالله : وش فيتس يابنيتي ليه حزينه ربي بيعوضتس غير اسامه .
نوف بحزن والدمع متحجر بعيونها : اسامه ماينعوض .
ام عبدالله وهي تبوس يد نوف : حبيبتي لاتبكين دموعتس غاليه .
مسحت نوف دموعها ووقفت : عن اذنكم بروح انام .
ابو اسامه : تعالي تقهوي معانا .
نوف : لا بروح ارتاح انا تعبانه .
وطلعت نوف من عندهم وجات امها : نوف حبيبتي اش فيك خلاص اسامه انتهى من حياتك الحزن هذا ليش ؟
نوف : لأني احب اسامه ولا راح انساه .
ام عامر : نوف حبيبتي حتى ام اسامه مستغربه من طلاقكم وزعلانه على ولدها وانتي ماهمك طلاقك همك اسامه .
سالت دموع نوف : اشلون مايهمني اسامه وهو حبيبي ولد عمي اللي عشت معاه طول عمري .
ام عامر وهي تمسح دموع نوف : خلاص لاتبكين والله يجبر قلبك ويصبرك اسامه مات .
نوف : لااا يمه لاتفاولون عليه والله اسامه عايش .
ام عامر : لو عايش كان لقيناه هو اختفى مو موجود بالمسشفيات وماخرج من الدوله ولا بالسجون يعني وين راح ؟
نوف : هو عايش وراح يرجع لي اسامه يحبني وماراح يخليني .
ام عامر : الله يجبر بخاطرك ماراح يخليك ؟ هو خلاك وخلى اهله كلهم والله العالم وين هو رايح .
مشت نوف من عند امها ودخلت بغرفتها وقفلت الباب وانخرطت ببكاء مرير .

**

**

**

لبست ليلى بنطلون ازرق وبلوزه ابيض جوبنيز ولبست عبايتها جات الماس عندها : ليلى تكفين لاتطلعين معاه .
ليلى وهي تطالع الماس : اقول مكياجي حلو ولا يبي له تعديل .
الماس وهي تمسك يد ليلى : ارجوك لاتطلعين معاه والله خايفه عليك .
ليلى : ليش انا بطلع مع وحش ؟
الماس : ايه اللي مثل عبدالله وحوش .
ليلى وهي تدف الماس : يله انقلعي واذا سألوك وين انا قولي لهم نايمه .
الماس : تكفين تكفين ليلى لاتطلعين .
ليلى : اقول يله انقلعي عن وجهي ومو انتي اللي تقررين اطلع ولا لا اذا امي وابوي ما منعوني انتي اش دخلك .
طلعت ليلى وركبت مع السايق ونزلت نقابها وطقت اللثمه وطالعها السايق بالمرايه : ليدي الى اين ذاهبه ؟
ليلى : بروح للسوق غرناطه .
وصلو السوق ونزلت ليلى واتصلت على عبدالله : الوو .
عبدالله : هلا وغلا هلا بالغاليه هااا وصلتي السوق ؟
ليلى : ايه وينك ؟
عبدالله : سيارتي bmw لونها ابيض .
ليلى : ايييه شفتك خلاص انت اللي لابس ثوب وكاب رمادي ؟
عبدالله : ايه .
قفلت منه ليلى وراحت له عند السياره : اركبي بسرعه لحد يشوفنا .
ركبت ليلى ومشى عبدالله ووقف عند الكوفي : اش تبين حبيبتي ؟
ليلى وهي تنزل غطاها : ابي اي شي .
طالعها عبدالله باعجاب ومسك يدها وباسها : اش الجمال هذا ؟
ابتسمت ليلى : عيونك الحلوه حبيبي .

**

**

**

ماجد : مهند والله ماتعودت اجلس بالمدينه متعود على القريه بروح لها .
مهند : خلاص بنروح القريه بس خله الين يهدى الجو وتزين الاوضاع اللي صايره بالعايله ونطلع للقريه .
ماجد : طيب اسامه اش صار عليه ؟
مهند : والله لنا اكثر من اسبوع ندور عليه مو موجود .
ماجد : يعني وين راح ؟
مهند : والله مو عارفين وين راح بس ان شاء الله بيرجع .
ماجد بحزن : اسامه عمره ما غاب يوم واحد اش اللي غيره .
مهند : عين ماصلت على النبي نوف واسامه عمرهم ماتفرقو يطلقها كذا وبدون سبب .
ماجد : احنا مو عارفين اش السبب .
مهند : الله يهديه ويرجعه بالسلامه .. اش رايك ناخذ لنا عمره .
ماجد : لا لا الوقت هذا مو مناسب خله على الاقل بعد شهر .
مهند : والله البارح اشتقت لك يا ماجد من 6 اشهر ما انام إلا معاك امس يوم دخلت غرفتي حسيت اني بسجن وخواتي يسألوني اش فيك متضايق قلت لهم اشتقت لماجد والله سعاد شوي ولا تعطيني كف لك شهور معاه وتشتاق له ماتشتاق لنا .
ضحك ماجد : ياخوفي نتزوج وننسى بعض .
مهند : لا اش دعوه احنا عيال عم وطول عمرنا على قلب واحد .
ماجد : طيب اليوم تعال نام عندنا والله اشتقت لك وما اقدر اجلس 10 ساعات بدونك .
مهند : هههههههه والله صرنا نشتاق لبعض بس مانشتاق لأهلنا اللي ناخذ 6 اشهر مانشوفهم .
ماجد : ياخي خلهم يحسون فينا عشان نشتاق لهم .
مهند : اليوم بننام بالاستراحه لنا ثلاث اشهر مادخلناها .
ماجد : اوك بس مانجلس فيها اكثر من ثلاث ايام بنرجع القريه .
مهند : من عيوني بس بنمشي الحين الساعه 11 وانا بنام عشان اصحى قبل صلاة الفجر .
ماجد : يله .
ركب ماجد بسيارته سوناتا 2012 لونها ابيض وركب معاه مهند وتوجهو لاستراحتهم اللي بحي الجنادريه .

**

**

**

ام وليد بخوف : هذي وينها روحي صحيها من الصبح وهي نايمه والحين انتصف الليل وهي ماصحت .
الماس وهي ترجف : يــ يـ يــيمه ليلى طلعت للسوق من الساعه 4 العصر .
حطت ام وليد يدها على فمها : ايش ؟
الماس : يمه والله حاولت امنعها بس ما اقتنعت وطلعت .
ام وليد وهي تجلس ع الكنبه بفتور : حسبي الله على بليسك اشلون تخلينها كل هالمده ليش ماقلتي لي .
الماس وهي تبكي : يمه هي قايله لي ما اقول لأحد .
ام وليد : اعطيني جوالي بتصل على السايق .
اعطتها الماس الجوال واتصلت على السايق : الوو .
سوهار : اهلا مدام .
ام وليد : وين ليلى ؟
سوهار : مدام ليلى راحت مع سياره من الساعه 4 عصر .
ام وليد بخوف : ايش ؟ راحت مع سياره .. بلعت ريقها .. مع صديقاتها صح ؟
سوهار : لا مدام هي روه مع سيد .
ام وليد : بلغ عليهم بسرعه ابي بنتي .
سوهار : اوك مدام .
وقفلت منه وصارت تبكي بقوه : الماااس بنتي ضاعت انا اللي ضيعتها انا السبب بضياع وصياع بنتي ياويلي ياااويلي .
الماس : يمه ليلى ضيحة صديقات السوء .
ام وليد : آآآه ياويلي ياويلي يافضيحتنا بين خلق الله بس ياربي ان اخوك مايعرف بالسالفه يااااويلي على بنتي ضاع شرفنا خلاص .
الماس : حسبي الله عليها هي كانت تكلمه من سنه واليوم اول يوم تقابله .
مسكت ام وليد الماس مع اعلى بلوزتها : انتي اش قاعده تقولين ؟ تعرفين عنها وساكته .
الماس وهي تبكي : يمه والله انا دايم اقول لها بقول لك وهي تقول لا انا ما ابي احد يفرقنا .
ام وليد : جعلها تفرق عظامها ان شاء الله .
دخل الوليد ووقفت ام وليد وهي تبكي : وليييد اختك ضاعت .
وليد بخوف : اش صاير اش السالفه .
طلعت الماس تركض لغرفتها .
ووليد طالع امه وباستغراب وخوف وهلع : يمه اش صاير اش السالفه ؟
ام وليد : ليلى ياوليد طلعت مع واحد من الشباب ومارجعت للحين .
جن جنون وليد : يمه انتي اش قاعده تقولين اكيد هذا مقلب .
ام وليد : اي مقلب يرحم امك اختك ضاع شرفها خلاص انتهت .
وليد : وهي وينها الحين ؟
ام وليد : ما ادري بس سوهار يقول طلعت مع واحد من الشباب .
رن جوال وليد : نعم سوهار .
سوهار : بابا تعال شوف شقه مال مدام ليلى .
وليد : طيب وصف لي المكان والحين جاي .
سوهار : شارع ..... حي ...... الشقه رقم ....
وصل الشقه واتصل على الماس : اش اسم اللي طلعت معاه ليلى .. مع السلامه .
دخل جواله بجيبه " جاك الموت ياتارك الصلاه "
ووصل للشقه اللي بالدور الرابع بعد ما استفسر من الرسبشن ورن الجرس بعد نص ساعه فتح الباب عبدالله : انت عبدالله .
عبدالله : ايــه .

**

**

**

صحت نوف الساعه 2 ونص وقامت وصلت لها ركعتين " يااارب تحفظ اسامه وتخليه لي ولاتفرقني انا وياه يارب ما اذوق مرارة فراقه "
خلصت صلاتها ونزلت شرشفها ونزلت تحت وشافت جدتها جالسه بالارض وتتقهوى جات عندها نوف : سلام عليكم .
ام عبدالله : هلا وغلا ببنيتي ياهلا والله .
نوف وهي تجلس قدام جدتها : سلامات جدتي ليش صاحيه ؟
ام عبدالله : متعوده اصحى الساعه 2 واصلي وانتظر الفجر واسوي فطوري واطلع مع جدك للغنم والبعارين وحلالنا .
نوف : الله يعينك كل يوم وانتي على هالموال ؟
ام عبدالله : والله من عرفتي للدنيا اول كنت ببيت اهلي والحين ببيت رجلي .
نوف : مشاء الله عليك انا اصحى الساعه 9 ومسميني العجوز .
ام عبدالله بضحكه : اول كانو مهند وماجد الله يخليهم لي كذا وبعدين تعودو من بعد رمضان الساعه 4 الفجر وهم صاحين وينامون بعد صلاة العشا.
نوف تذكرت ماجد : ايه صح ماجد وينه والله ماشفته من زمان جاني فالمستشفى مره ولا عاد جاني .
ام عبدالله : تو اتصل علي يتطمن عليك يقول جوالك مقفل .
نوف وهي توقف : عن اذنك جدتي بروح اكلمه .
ام عبدالله : اذنك معاك حبيبتي .
راحت نوف لغرفتها وخذت جوالها وفتحته واتصلت على ماجد : الوو .
ماجد : هلا والله باختي الغاليه هلا بشمعة البيت .
نوف : هلا بك زود .. اش اخبارك ؟
ماجد : الحمدلله بخير دامي اسمع صوتك .
نوف : وينك ؟
ماجد : انا بالاستراحه .
نوف : اذا تقدر تعال بسلم عليك بجلس معاك لي 6اشهر اشوفك من اربعاء لأربعاء .
ماجد : من عيوني .
نوف : انا بإنتظارك لاتتاخر .
ماجد : اوك .. مع السلامه .
نزلت نوف تحت وجلست بالصاله " جدتي مو هنا اكيد نايمه "
اخذت نوف الدفتر والقلم اللي ع الطاوله وكتبت

غاب القمر وغابت افراحي
واشرق الحزن واشرق اهاتي
وغاب الحبيب وغابت حياتي
امشي في الحياه بلا هدف ومعنى
ودمعي هو من يسليني
لااعرف الفرح والفرح لايعرفني
غاب الحبيب وتركني بلا روح
هل هناك مكان سيجمعني بك ؟
هل هناك زمان سأراك به ؟
انا بعدك ينزف جراحي
لايلتئم الا بين يديك
(( خاطره من الكاتبه ))

سكرت نوف الدفتر وانفتح الباب ودخل ماجد : سلام عليكم .
وقفت نوف : وعليكم السلام هلا والله بالغالي .
سلمت عليه وجلسو : اش اخبارك ؟
نوف : الحمدلله على كل حال .
ماجد : نهائيآ ماتوقعتها من اسامه ولد عمي العاقل يسوي كذا ؟
نوف بحزن ودموعها تنزل على خدها : صدمتك مو اكبر من صدمتي .
حس ماجد انه ضايق نوف بكلامه : انا اسف بس والله منصدم منه للحين .. طاح من عيني .
نوف : ماجد لاتتكلم على اسامه وانا موجوده ترا هذا اسامه ما ارضى عليه .
ماجد : انتي هنتي عليه وطلقك ليش مهتمه لأمره انتي ماهميتيه .
نوف وهي توقف : لو انا ماهميته على قولتك كان واجهني بعد طلاقي .
ماجد يحاول انها تكره اسامه : لا يكون يحب وحده ثانيه وطلقك واختفى عشان يتزوجها .
عصبت عليه نوف : انا الغلطانه اللي اتصلت عليك وقلت لك تجي .
وقف ماجد وباس راسها : نوف سامحيني بس من القهر عليك قلت كذا .
نوف وهي توقف : مسامحتك بس لاعاد تغلط على اسامه ترا هو ماتغير بوجهة نظري .

**

**

**

اعطاه وليد كف ومسكه مع ياقة ثوبه : ياقليل الحيا ياللي ماتستحي هانت عندك بنت بلادك تلعب بعرض الناس بشرفهم .
ضحك عبدالله : والله بنتكم هي اللي اعطتني رقمها واللي مثلها صيده سهله .
دفه وليد وطاح عبدالله على الارض وركله وليد برجله مع بطنه ودخل بالغرفه وانصدم من اللي قاعد يشوف حس انه بكابوس وبصوت باهت مبحوح : ليلى .. لــــيلى .
راح لها وشافها ملقاه على السرير وكلها دم ولبسها الابيض تحول الى احمر وشاف المسدس جنبها وصرخ : ليــــــلى .
وراح لعبدالله : ليش قتلت اختي ؟
عبدالله : هي اللي قتلت نفسها انا ماسويت لها شي وتحمد ربها اني ماسويت لها شي .
وليد : لا انت اللي قاتلها يوم ضيعتها وسلبت شرفها واغلى ماتملكه قتلتها .
عبدالله : والله والله مالمست شعره منها هي دخلت هنا وقتلت نفسها .
اخذ وليد المزهريه بيقتل عبدالله وطلع عبدالله يركض .
اتصل وليد على الشرطه وباشرو الموقف بـعد 10 دقائق .
اتصل وليد على ابوه : الوو .
ابو وليد : هلا وليد يالله صباح خير انت تدري كم الساعه 4 الفجر اش مصحيك .
وليد : يبه ليلى تطلبك الحل .


تهجد صوت ابو وليد : انت وش قاعد تقول .
وليد وهو يبكي : يبه انا لقيتها بشقة شباب وقاتله نفسها والشرطه بعد التحقيق والاجراءات قالو انه هي اللي قاتله نفسها بثلاث رصاصات .
ابو وليد : لا تقول لأحد خلاص قفل على الموضوع وبنقول لهم ليلى ماتت وبس .
وليد : يبه هذا همك ان الناس ماتعرف يبه انت اللي صيعت اختي اختي راحت ضحيتكم ماتعرف تصلي ماتعرف اصول الاسلام .
ابو وليد وهو يبكي : خلاص ياولدي لاتزيد الجرح جرح استر على اختك واكفل عنها يتيم وبنبني لها مسجد الله يغفر لها .
وليد : يبه هذي منتحره وفوق هذا كله طالعه مع ولد بشقته .
ابو وليد : وانت اش عرفك بالسالفه ؟
وليد : الماس خبرتني وسوهار كان يراقب ليلى يقول خايف عليها يبه الغريب يخاف عليها اكثر مني ومنك .
ابو وليد : لحد يعرف بسالفة ليلى ولا احد يعرف انها مقتوله تقول صار عليها حادث وماتت .
وليد : يبه تبيهم يشرحون الجثه ولا لا ؟
ابو وليد : لا خلاص انا متنازل عن كل شي .

**

**

**

دخلو ام اسامه وام عامر ببيت ابو وليد وكانو فيه خالات ليلى : سلام عليكم .
الكل : عليكم السلام .
سلمت ام اسامه على ام وليد : عظم الله اجرك .
ام وليد وهي تبكي : جزاك الله خير .
سلمت عليها ام عامر : عظم الله اجرك ويارب تجعل قبرها روض من رياض الجنه .
ام وليد : امين .
وجلست ام وليد وكانت جنبها ام عبدالله : وين بنتك الماس .
ام وليد : بغرفتها .
طلعت ام عبدالله لغرفة الماس وطقت الباب وفتحت لها الماس : اهلآ .
ام عبدالله استغربت من الماس ماتبكي : الماس اش فيتس مو محزنه على اختس .
الماس : ما ادري فجأه وانا ابكي حسيت انها ماتستاهل كل الدموع هذي .. جدتي انتي تعرفين اشلون ماتت .
سالت دموع جدتها : ماتت بحادث طالعه مع السايق بروحها .
الماس : ياليتها بروحها مع السايق .. وبهمس .. هي انتحرت والمفروض المنتحر ماله عزا .
ام عبدالله : انتي وش تقولين لا لا ليلى ماتنتحر .
الماس : وياليت بس انتحرت هي كانت مع واحد من الشباب بشقته .
ام عبدالله من يوم سمعت السالفه فقدت وعيها وطاحت على الارض صرخت الماس : جدتــــــــــي .
وجات ام عامر : عمتي .
واتصلت على ماجد وجو ماجد ووليد وشالوه وطلعو المستشفى .

بقســـم الرجــــال

جا مهند وجلس جنب عامر : يابو الشباب اش فيك محزن .
عامر : جالس افكر بيومي اش راح يصير بالناس اللي يعرفوني يعني بصير نفس لـــيلى حتى ابوها واخوها مو متأثرين .
مهند : لا صدقني كلهم راح يتأثرون فيك انت غير عنها .
عامر : بس ابوهـــا ابوهــا مو متأثر.
مهند : وانت اش عليك منهم .. اقول ياولد العم انا وماجد بكره بنطلع للقريه تروح معانا ؟
عامر : انت ماتدري اش اللي صار ؟
مهند بخوف : اش اللي صار ؟
عامر : جدتي فقدت وعيها ونقلوها للمستشفى .
مهند وهو يوقف : ماجد وينه لسه مارجع من عند امه .
عامر : هو اللي ودى جدتي للمستشفى .
مهند : انا بروح لهم .
عامر : طمني على جدتي .
طلع مهند وركب بسيارته واتصل على ماجد وقاله اسم المستشفى وراح له مهند ونزل وتوجه لماجد : هاا جدتي اش فيها ؟
ماجد : والله ما ادري اش اللي صار عليها لها ربع ساعه هنا .
مهند بخوف وتوتر : هي اش صار لها ؟
ماجد : راحت عند الماس وماندري اش صار وفقدت وعيها .
مهند : الله يستر .
طلعت الدكتوره وراحو لها : هاا دكتوره طمنينا .
الدكتوره : هي منيحه بس ارتفع معاها الضغط شوي .
ماجد : اقدر اشوفها ؟
الدكتوره : تفضلو .
دخلو عند جدتهم : سلام عليكم .
ام عبدالله : هلا والله بعيالي .
سلمو على راسها وجلس مهند جنب جدته وماجد ع السرير .
ام عبدالله تذكرت ليلى وسالت دمعتها : ياعيالي بنت عمكم منتحره .
مهند بخوف : مـيـن ؟
ام عبدالله : ليلى الله يغفرلها ويرحمها انتحرت .
ماجد : لا حول ولا قوة إلا بالله وهي ماتدري ان المنتحر بالنار خالد مخلد .
ام عبدالله وهي تبكي : لاتقول كذا انتم بس ادعو لها بالرحمه .
ماجد : جدتي انتي مين اللي قالك ؟
ام عبدالله : الماس هس قالت لي السالفه كلها وليلى مو منتحره وبس بس الميت ماتجوز عليه إلا الرحمه .
مهند : إنا لله وإنا اليه راجعون وعمي ووليد اشوفهم مو محزنين عليها انا مستغرب منهم .
ام عبدالله : خلاص انا ما عاد لي قعده هنا بمشي لبيتي .
ماجد : هذي الساعه المباركه بنمشي للديره بعد صلاة العشاء واربع ساعات ان شاء الله واحنا واصلين .
ام عبدالله : انا ودي اخذ معي نوف لازم تغير جو نوف تغيرت ماعاد على لسانها إلا اسامه ابيها تشوف الديره والحين وقت امطار وراح تتغير ان شاء الله .
ماجد : ما اعتقد انها بتروح وهي لسه بعدتها .
ام عبدالله : بس هي بحاجة تغيير الجو .

**

**

**

ام مشاري : لا حول ولا قوة إلا بالله انا لله وإنا اليه راجعون .. متى ماتت بنتهم ؟
متعب : ماتت الفجر وصلينا عليها الظهر .
ام مشاري : وانت ليش ماقلت لي بدري بروح اعزي اهلها هذولا جيرانا اتوقع لو المصيبه عندنا كان جو وعزونا .
متعب : يمه والله انشغلت وماتوقعت انك بتروحين لأم وليد بعد اللي هي سوت فيك .
ام مشاري : صح اني ماروح لها بوقت فرحها بس اروح لها بوقت حزنهم .
متعب بعد ماباس راس امه : انتي مدرسه بكلامك هذا .
ام مشاري : يله بروح اصلي المغرب وابيك توصلني لبيتهم .
متعب : حاضر .
وطلع متعب لغرفته واتصل على اسامه : الوو .
اسامه : هلا متعب .
متعب : اش اخبارك ان شاء الله مرتاح .
اسامه : الحمدلله على كل حال .. اش اخبار نوف ؟
متعب : الحمدلله بخير .. بنت عمك ليلى تطلبك الحل .
اسامه : الله يرحمها .
متعب : اقولك ليلى تطلبك الحل بنت عمك ماتت .
اسامه ببرود : اوك الله يرحمها .
متعب : تصدق كنت شايل هم اشلون بتتقبل الخبر صار عادي مره .
اسامه : الله يغفر لها ويرحمها هذي بنت عمي بس ما نعرفهم زين امهم تكرهنا من صغرنا مانعرف بعض وليد يوم كبر صار معانا ولا البنات مانعرفهم ولا يعرفونا بس الماس دايم تضايقني بكلامها وتحاول تسبب بيننا مشاكل انا ونوف .
متعب : نوف امس طلعت من المستشفى بس امي تقول حالة نوف ابدآ ماتسر لاعدو ولاصديق وماعلى لسانها إلا اسمك وماتسولف مع الناس ولا هي معاهم جالسه بروحها وكل كلامها عندك ودمعتها ماجفت من يوم عرفت الخبر .
اسامه بحزن : الله يكون بعونها والله توقعت انها بتكرهني ولا راح تذكرني بالخير .
متعب : شكلها وفيه وماراح تتزوج غيرك .
اسامه : لا ان شاء الله ماراح تتزوج غيري .

**

**

**

ببيت ابو عــــامر

ام عبدالله : والله ياولدي بيتي وحلالي ماعنده احد ولازم امشي الحمدلله تطمنت على بنيتي نوف وجلست هنا ولازم امشي وعيالي بعد يقولون مو مرتاحين هنا بيرجعون للقريه .
طالع ابو عامر بمهند وماجد : يعني انتم اللي تمشون امي على اللي تبون احنا اهلكم ولاتخلوني احلف انكم ماتطلعون من هنا .
مهند بابتسامه : عمي جدتي ماعندها احد غيرنا واحنا ربي خلقنا مانحب المدينه وانا اكره اجواء المدينه ازعاج وما ارتاح إلا بالقريه وماجد نفس الشي وخلونا عند جدتي والله مرتاحين عندها ونساعدها ونسوي لها اللي تبي .
ام عبدالله : والله انهم مالين على البيت جعلني ما ابكيهم إذا طلعو للكشتات يضيق صدري .
باس ابو عامر راس امه : جعلك ان شاء الله ماتنحرمين منهم .
ام عبدالله : ولا يحرمني منك ان شاء الله .. يله ياعيالي بنمشي .
طلعو مهند وماجد وجدتهم .
وجلس ابو عامر : شفت اخوك ياعامر صار مايحب يجلس عندنا انا اللي معوده على كذا بس الحمدلله انه جالس عند امي .
عامر : يبه ماجد ومهند رجال وينشد فيهم الظهر الحين اللي بسنهم مايهمهم لا امهم ولا ابوهم هذولا مع جدتي .
ابو عامر : والله ان ولدي وولد اخوي رافعين راسي .
دخلت العزوف وسلمت على راس ابوها وجلس جنب عامر : جدتي راحت .
عامر : ايه .
العزوف : نوف غبيه ليش ماراحت معاها والله اجواء الديره ماتفوت الايام هذي امطار ووناسه .
ابو عامر : الله يعين نوف ماهمها همك الوناسه وبس نوف تتعذب تموت باليوم الف مره عشان اسامه وهو مايندرى وينه الله يرحمه اذا كان ميت والله يحفظه اذا كان عايش .
عامر : امي وينها ؟
العزوف : لسه مارجعت من عند عمتي ام وليد .
ابو عامر : العزوف اللي مثلك يروح يعزي ام الميته انتي ماتت بنت عمتك ماهمك .
العزوف بحزن : والله يايبه اني متأثره بوفاتها بس ما ادري ليش مو قادره اروح لأمها انا ربي خلقني وانا اكرههم اشلون اروح لهم .
ابو عامر : لو تكرهينهم هم بوقت الشده الحين ولازم تروحين لهم امك وام وليد ولا مره راحو لبعض شوفي امك من الظهر هي وام اسامه عند ام وليد لازم توقفين مع اهل عمك بوقت الشده اتوقع لو عندهم فرح كان ما جلستي هنا .

**

**

**
مرت ايام العزاء مافيه احد محزن على ليلى إلا امها والكل مستغرب انهم مو قادرين يحزنون عليها .
نوف : يمه ما حد عرف شي عن اسامه ؟
ام عامر : لا والله ياحبيبتي مانعرف عنه شي .
نوف : يعني اش اللي صار عليه يارب طمني عليه والله خايفه عليه بالمره .
ام عامر : نوف والله محد سوا سواتك يطلقك وتخافين عليه هذا صار من اعدائك .
نوف : لا يمه اسامه طول عمره حبيب قلبي ولا راح احب غيره وماراح يصير من اعدائي لو قتل اقرب الناس لي .
ام عامر : اش اللي صارلك اسبوع وثلاث ايام ماعلى لسانك إلا اسامه .
نوف : يمه اسامه روحي وقلبي وحياتي كلها اشلون بتمشي حياتي طبيعيه بدونه .
ام عامر : ولد عمك صاير فيه شي اكيد .. وابراهيم ولد خالتك مريم يبيك .
نوف وهي تحاول انها تصير طبيعيه : اش هالناس ولد عمي مطلقني من اسبوعين ومختفي وبنت عمي ماجف تراب قبرها وهم جايين يخطبون قلة حيا وما توقعت ابدآ ان خالتي مريم كذا .
ام عامر : هي تحبك مثل بناتها وتحب لك الخير وتبي تخطبك لولدها وهو يحبك .
نوف : لو يحبني انا ماراح اتزوج غير اسامه لأني ماراح احب غيره .
ام عامر : نوف تكفين وافقي على ابراهيم وراح يصير زواجكم مختصر بعد عدتك ان شاء الله .
نوف : على جثتي اوافق على ابراهيم .
دخلت العزوف : سلام عليكم .
نوف وامها : عليكم السلام .
العزوف وهي تجلس جنب نوف : الخدامه تقول لقت صوره تحت مخدتك ترميها بالزباله ولا لا ؟
وقفت نوف : لااا لاترميها .
العزوف : اجلسي اجلسي انا شفت الصوره وقلت لها ترجعها مكانها .
ام عامر : من صورته ؟
نوف : صورة اسامه .
ام عامر : اسامه صار غريب عنك ولد عمك وبس .
نوف : بس انا احبه ومستحيل اكرهه وصورته لازم تصير عندي .
العزوف : يمه انتي حاقده على اسامه ؟
ام عامر : لا والله مو حاقده عليه ولا بقلبي عليه شي بس ما ابي بنتي تعلق فيه اكثر .
نوف وهي تمسح دموعها : يمه والله ما اكره اسامه لو على جثتي حبيته من صغري ومستحيل اكرهه بيوم وليله .
ام عامر : مثل ماحبيتيه راح تنسينه .
العزوف : يمه انا عزمتني شموخ بنت خالتي بروح معاها .
ام عامر : لا .
العزوف : يـــمه ليش ؟
ام عامر : انا ما اثق بشموخ واخاف يصير لك اللي صار لليلى .
شهقت العزوف : بسم الله علي لا يمه انتم واثقين فيني وانا قد الثقه .
ام عامر : بعد اللي صار بليلى انا مستحيل اخليك تطلعين بروحك .
رن جوال نوف : الوو .
عبير : هلا والله بالغاليه اخبارك يابنت عمي ؟
نوف : الحمدلله بخير .. اش اخبارك واخبار حمودي ؟
عبير : الحمدلله تمام حبيبتي اذا فاضيه بجيك .
نوف : ايه فاضيه حياك الله .
عبير : مع السلامه .
نوف : مع السلامه .
العزوف بابتسامه : عبير بتجي ؟
نوف : ايه .
العزوف : نوف اش فيك والله من زمان عن ابتسامتك .
وقفت نوف : اشلون ابتسم وانا ما اعرف عن اسامه اي شي الاسبوعين اللي راحو متوقعه بأي وقت يدخل علي احد ويقول اسامه مات .
العزوف : احمدي ربك انتي بخير لو شفتي الايتام اللي بسوريا اش راح تسوين والله دموعهم تذوب الصخر .
نوف : وانا بدون اسامه اتمنى اموت خلاص حياتي مالها معنى اعيش بدون هدف .
ام عامر : اللهم طولك ياروح لو رجع اسامه الحين بتروحين له وهو مطلقك ؟
نوف : طبيعي لا .. بس على الاقل متطمنه عليه اقدر اشوفه .
العزوف : مستحيل ان اسامه مطلقك كرهآ فيك هو اكيد عنده ظروف مايقدر يكمل حياته معاك .
رن الجرس وفتحت الخدامه الباب ودخلت عبير : سلام عليكم .
الكل : عليكم السلام .
وسلمو عليها وحضنت نوف : الحمدلله على سلامتك .. سامحيني ياقلبي ماجيتك بالمستشفى والله ماقدرت اطلع للرياض إلا اليوم .
نوف : عذرك معاك حبيبتي يكفي انك اتصلتي .
جلسو وعبير متعاطفه مع نوف : اش فيك حزينه معقوله عشان طلاقك ؟
نوف : لا والله خايفه على اسامه .
عبير : انا اخته زعلت عليه عشانه طلقك وانتي خايفه عليه .
نوف : ياليت بس يرجع والله تنحل الف مشكله عندي .
عبير : والله شكله مو بالبلد .
نوف : إلا هو موجود لأنهم ماحصلوه بالرحلات اللي بنفس اليوم .
عبير : والله الأمر هذا محيرني .

**

**

**

يوسف وهو يجلس جنب اسامه : اسامه اش فيك ماتجلس معانا ولا تضحك معانا ولا تاكل معانا كل وقتك جالس هنا وتبكي اش فيك .
اسامه حس انه بحاجة احد يفضفض له : آآآه يايوسف لو تدري باللي بقلبي .
يوسف : سلامتك من الاه قولي اش فيك اعتبرني اخوك وفضفض لي يمكن ترتاح شوي .
اسامه : ما اعتقد اني برتاح انا بعيش باقي عمري على هالحال .
يوسف : طيب قولي اش فيك والله احس انك بمشكله او بمصيبه كبيره .
اسامه وهو يسند ظهره على الشجره اللي وراه : انا تزوجت بنت عمي قبل سنه وقبل اسبوعين اكتشفت اني عقيم وطلقتها وجيت هنا وبتغرب طول عمري ولا راح اقابل احد من اهلي .
يوسف : وبس ذي المشكله اللي قالبه حياتك .. كان قلت لأمك او ابوك وهم يحلون المشكله واتوقع لو قلت لزوجتك ماراح تطلب الطلاق .
اسامه : بس انا تغربت عشان ما اشوفهم يزفونها لغيري انا احبها ولا راح اعيش بدونها .
يوسف : هونها وتهون انا مشكلتي اكبر من مشكلتك اضعاف اضعاف مشكلتك .
اسامه : اش مشكلتك .
يوسف : انا تربيت عند زوجة ابوي تضربني وانا صغير وتخليني اتاجر بالمخدرات مع اخوها وانا عمري 10 سنوات كبرت وانا ما اعرف إلا المخدرات عرف ابوي عن السالفه هذي وصار يضربني بالطالعه والنازله مايمر يوم مايضربني كنت اتعذب بس ما اشكي لأحد تبلتني خالتي باشياء رذيله شي حقير طردني ابوي من السعوديه كلها وتبرا مني وجيت هنا وكملت دراستي انت على الاقل تقدر ترجع لك اهل ولا انا مالي الا اخوياي لي سنتين هنا كان عندي واحد سعودي راح له 6 اشهر والله من يوم طلع من المانيا حسيت اني ما اقدر اكمل حياتي صرت متضايق طول الوقت والحمدلله جيت انت وان شاء الله تجلس معاي ع الاقل سنه او سنتين العرب هنا مو مقصرين بس انا محتاج واحد من عيال بلدي .
اسامه : طيب انت اشلون عايش هنا من وين لك فلوس ؟
يوسف : انا انظف السيارات العصر واخذ مبلغ يعيشني يومي .. وانت ؟
اسامه : انا خويي يرسل لي فلوس معاي الحين 100 الف اذا كان محتاج كلي فداك انا مصروفي اليومي 10 ريال .
يوسف : لا مشكور وماتقصر بس انا مو محتاج .
اسامه : اشلون مو محتاج وانت تغسل السيارات هذي مو شغلتنا كسعوديين .
يوسف : كل واحد يمد لحافه على قد رجليه انا محتاج الفلوس هذي ولازم اشتغل عكسك مو محتاج لا فلوس ولا شغل .

**

**

**

ام اسامه : ولدي له اسبوعين مانعرف عنه شي يعني اش صار عليه .
ابو اسامه : والله تعبت يانوره وانا ادور عليه خلاص اعتبري الولد مات وبننساه اسبوعين مسوين بحث مستمر ماحصلناه .
ام اسامه : بس هذا ولدي اشلون تقولي انسيه انا مستحيل انساه هذا حشاشة جوفي .
ابو اسامه : وحتى انا هذا ولدي بس مابيدي حيله ومافيه إلا اني اعتبره ميت ولا اتعب نفسي واذا جا حياه الله .
سالت دموع ام اسامه : يعني خلاص ماراح اشوف ولدي .
ابو اسامه : الله اعلم متى تشوفينه والله ما ادري لو يرجع بكره .
ام اسامه : انا مو مقطع قلبي إلا نوف كلكم نسيتوه إلا هي نوف هي اللي تذكرني بأسامه .
ابو اسامه : نوف مجروحه من اسامه نوف تتعذب محد حاس فيها انا اقول لو تخلون 5 % من اهتمامكم باسامه لنوف احسن .
ام اسامه : نوف بيننا بس اسامه ماندري وين ارضه من سماه ماندري حي ولا ميت .
ابو اسامه : مصير الحي يتلاقى اذا الله كاتب انه بيرجع بيرجع .
ام اسامه : ونعم بالله بس انا متوقعه انه ماراح يرجع .
رن جوال ام اسامه وردت بـ : هلا مها .
ام عامر : هلا بك اش اخبارك ؟
ام اسامه : الحمدلله بخير .. نوف كيفها اليوم ؟
ام عامر : والله البنت هذي عذبتني بس تبكي وماتبي تكلم احد وكل كلامها عن اسامه انا خايفه عليها .
ام اسامه : ماتنلام اسامه غالي عندها بس احس ان حزنها عليه زايد عن حده انا اخاف يصير لها شي من حزنها هذا .
ام عامر : بس رغم حزنها إلا انه عندها امل ان اسامه راح يرجع .
ام اسامه : ان شاء الله بيرجع .
ام عامر : آمــــين .
ام اسامه : مها تكفين اليوم تعالي تقهوي معاي والله من زمان عنك امس تحججين بالعزاء واليوم ماعندك شغل تعالي .
ام عامر : من عيوني بس بعد صلاة العصر وانا عندك .
ام اسامه : ترا بعزم ام مشاري .
ام عامر : حياها الله .
ام اسامه : مع السلامه وجيبي معاك العزوف ونوف .
ام عامر : نوف ماراح تجي معاي انا عارفه انها بترفض .
ام اسامه : الله يفرج همها .. مع السلامه .
ام عامر : مع السلامه .
فقلت ام عامر من ام اسامه وراحت لغرفة نوف وطقت الباب ودخلت : سلام عليكم .
نوف : عليكم السلام .
ام عامر : حبيبتي انا بروح لعمتك ام اسامه تروحين معاي ؟
نوف : لا يمه ما ابي اطلع من البيت .
ام عامر بحزن على بنتها : تكفين اطلعي غيري جو انتي من اسبوع ماطلعتي من هنا من المستشفى على طول للبيت غيري جو شوي .
نوف وهي تمسح دموعها : يمه ما ابي اطلع .
ام عامر وهي توقف : خلاص حبيبتي لاعاد تبكين انا ما ادري اش اللي صار لك دمعتك تنزل من اي شي .
وطلعت لغرفة العزوف : سلام عليكم .
وقفت العزوف : وعليكم السلام تو مانورت الغرفه .
ام عامر : منوره بوجودك ياقلبي .. تروحين معاي لام اسامه .
العزوف : ايه متى بتروحين ؟
ام عامر : بعد صلاة العصر .
العزوف : اوك بروح معاك .
نزلت ام عامر تحت وجلست بالمجلس وجا عامر : مساء الخير .
ام عامر : هلا بالغالي مساء النور .
عامر : يمه كلمك ماجد ؟
ام عامر : ايه كلمني الساعه 9 يقول وصلو الديره الساعه 12 بالليل .
عامر : الله يعين جدتي على مهند وماجد انا ما ادري اشلون متحملتهم .
ام عامر : لا جدتك اكيد مبسوطه بعيال عيالها انهم ساكنين عندها
بـــــقريه نــائيه احـد قرايا مدينة الرياض تبعد عن الرياض 300 كيلو متر كان المطر يهطل بشده والارض اللي تميل للكثبان الرمليه اصبحت طين من آثار المطر والنوافذ الحديديه تتفتح وتتسكر بفعل الرياح السريعه في بيت فخم نوعا ما في قريه بعيده عن الاضواء بيت دورين لونه بيج وبني يختلف عن البيوت الشعبيه اللي جنبه بيت ام عبدالله .
كانو مهند وماجد جالسين بغرفتهم ومهند فاتح الدريشه : الله تعال ماجد شوف الحياه شوف المطر شوف الجو الخلاب .
ماجد وهو يرجف من البرد : سكر الدريشه بموت من البرد وانت متمتع بالجو .
مهند وهو يسكر الدريشه : والله اجوا القريه تنسيني هموم الدنيا ومشاكلها .
ماجد : انت عندك هموم ؟
مهند : ليش مو انسان مو بني ادم ؟
ماجد : بس امثالك ماعندهم هموم حياتهم مشاء الله مليئه بالافراح مايعرفون الاتراح .
مهند : لا تنسى انك قدوتي فالحياه وما استغني عنك .
طق الباب ودخلت ام عبدالله : سلام عليكم .
ماجد ومهند : عليكم السلام .
ام عبدالله : تعالو صلو مع جدكم تراه زعلان عليكم مأخرين صلاة العصر .
نزلو ماجد ومهند وام عبدالله رجعت للمجلس عند الجارات وصديقات عمرها ام عبدالرحمن وام شريف وام سعد .
ام شريف : إلا ماقلتي لنا يا ام عبدالله عيال عيالتس ليش يجلسون عندتس ؟
ام عبدالله : والله بس يغيرون جو وهم يحبون يجلسون هنا اكثر من جلوسهم بالرياض .
ام سعد : الله يخليهم لتس وامهاتهم وينهم عنهم يعني مايبونهم .
ام عبدالرحمن : وانتم وش تبون بالناس ؟.
ام شريف وهي توقف : انا بروح لبناتي المطر كل ماله يزيد والله اني خايفه على البنات .
ام سعد : وانا بروح معتس والله اني خايفه المغرب قرب يأذن وحنا جالسين هنا .
طلعو ام شريف وام سعد .
وصبت ام عبدالله القهوه لـ ام عبدالرحمن : بنتس لطيفه وش اخبارها ؟
ام عبدالرحمن : الحمدلله بخير ورجلها طلقها بعد ما مات ولدها .
ام عبدالله : ياحافظ ليه يطلقها مو هي اللي قتلت ولدها .
ام عبدالرحمن : والله محنا عارفين ليه طلقها .. إلا نوف بنت ولدتس وش صار عليها ؟
ام عبدالله تذكرت نوف وحالتها : الله يكون بعونها والله من يوم عرفت بخبر طلاقها وهي تبكي ودموعها ماتجف .
ام عبدالرحمن : بس والله ماهقيتها منتس يام عبدالله بنت ولدتس مانشف تراب قبرها وانتي عازمتنا عندتس .
ام عبدالله : الله يرحمها ويغفر لها ويسكنها فسيح جناته وجميع اموات المسلمين .
ام عبدالرحمن : انا بنت عمتس قولي لي وش فيتس احس انتس متغيره .
ام عبدالله : بنت ولدي منتحره .
شهقت ام عبدالرحمن : اللهم صل على محمد وليه تنتحر يعني قانطه من رحمة الله .
ام عبدالله : الله يجبر صوابها ويجبر قلب امها .
ام عبدالرحمن : ايييه تذكرت العنود بنت حمد عرسها الخميس الجاي بتحضرينه ؟
ام عبدالله : والله مدري امها ماعزمتني والعرس باقي عليه اسبوع اذا ماعزمتني ماني حاضره العرس .
ام عبدالرحمن : اكيد ابو عبدالله معزوم .
ام عبدالله : والله ما ادري عنه .

**

**

**

سعاد : والله اشتقنا لك يالعزوف .
العزوف : وانا اكثر بس جات المدرسه وخربت جلساتنا مع بعض وسهراتنا مع بعض .
سعاد : إلا نوف اش اخبارها والله ما اقدر اروح لها عندي اختبارات ومذاكره .
العزوف : الحمدلله بخير بس متغيره حيل مو نوف اللي اعرفها صارت ماتتكلم إلا باسامه وطول وقتها تبكي .
سعاد : الله يصبرها ويعينها اش بتسوي اذا عرفت ان اسامه مات .
شهقت العزوف : مااااات ؟
سعاد : اسم الله عليك اش فيك لا انا مو متأكده انه ميت بس ماجا له اسبوعين يعني مات .
العزوف : الله يخليه لغاليه ان شاء الله ما مات .
سعاد : تصدقين حتى امي تقول خلاص مافيه امل ان اسامه يرجع .
العزوف : نوف لو احد يتكلم عندها بأسامه بشي مو زين احتمال تقتله .. خلينا منهم الا اش صار بالمدرسه انا امس كنت غايبه .
سعاد : والله امس فاتك كل شي البويه سمر تهاوشت مع ابله فوزيه وقالو انهم فصلوها اسبوع .
العزوف : ليش يحطون فصل اسبوع والله احس فله يفصلوني اسبوع ارتاح بالبيت .
سعاد : لا اكيد يخصمون عليها من السلوك .
العزوف : انا اكره سمر هذي كل يوم وهي جايه تقول تقبلين اعجابي .
سعاد : ماخلت بنت بالمدرسه ما اعجبت فيها هي وشلتها .
العزوف : ياكرهي لها .
طق باب الغرفه ودخلت اسماء : يالخونه جالسين هنا ومخليني عند الحريم .
العزوف : تعالي حياك الله .
جات اسماء وسلمت على العزوف : اش اخبار نوف ؟
العزوف : الحمدلله بخير بس متغيره حيل .
اسماء : انا بروح لها بتروحون معاي ؟
العزوف : لا لا سعاد لاتروحين وتخليني وبعدين انا ضيفه عندك لاتخلين عيب .
سعاد : بروح اشوف بنت عمي انا بس رحت لها بالمستشفى كم مره ومن يوم طلعت مارحت لها .
اسماء : عبير ونوف جالسات بالبيت بروحهم ومخلينا هنا يقولون مايبون ازعاج .
العزوف : تكفون بنروح لهم مانبيهم ياخذون راحتهم مو احنا اللي يكذبون علينا احنا مو بزران اصغركم انا وسعاد بثالث ثانوي .
اسماء : يله بنروح لها بس اتصلي على ابوي وقولي له امي تقول مانطلع وابوي مايعرف .
سعاد : احنا رايحين بيت عمي ومتعودين نطلع وابوي مايدري .
اسماء : اوك نطلع بس على ذمتك .
العزوف : طيب يله تحركو بسرعه .

**

**

**

عبير : اسامه اخوي وانا اعرفه زين ماراح يخليك .
نوف : اسامه دايم يقول مايفرقنا إلا الموت واحنا تفرقنا وهو موجود .
عبير : اش دراك لو انه ميت ؟
نوف : والله ما ادري بس احساسي يقول انه موجود وماراح يخليني .
عبير : طيب انتي ليش حزينه خلاص اللي صار صار لاتكدرين خاطرك ولاتنزل دمعه من عينك الدنيا فانيه وماتسوى .
نوف بحزن : قال ايش قال الدنيا ماتسوى واسامه مايسوى .
عبير : انتي بس تفائلي وربي راح يعوضك خير منه .
نوف : انا ماراح اتزوج غير اسامه .
عبير : بس ان شاء الله حياتك سعيده مع اسامه او بدونه ومايحتاج تكدرين خاطرك عشان طلاقك .. وشوفي اللي يتشمتون فيك ربي اشغلهم بأنفسهم ليلى ماتت وامها مريضه والماس مابقى لها احد .
نوف : الله يرحمها ويشفي ام وليد ويخليها لعيالها .
عبير : تصدقين اتصلت علي جدتي وتقول انا ابي اخذ نوف عندي تغير جو ورفضت حاولو تقنعونها .
نوف : لا هناك ما اقدر اخلي جدتي بروحها وانا ما ابي اجلس معاهم .
عبير : اهاا والله على بالي ماتبين تجلسين بالقريه .
نوف : وفيه احد يكره القريه ؟
عبير : كثييير يكرهونها خوات زوجي مايحبون القرايا .
نوف : غريبه .
دخلو البنات : سلام عليكم .
وقفت عبير : انتم اش جابكم ؟
راحت سعاد تركض لنوف وسلمت عليها : الحمدلله على سلامتك ياقلبي .
نوف : الله يسلمك .
العزوف بعد ماسلمت على عبير : جالسين هنا بروحكم ومخلينا ؟
نوف وهي تجلس : حتى انتم جالسين بروحكم اش اللي جابكم ؟
سعاد وهي تجلس جنب نوف : حرام عليك جايين نتطمن عليك وتقولين اش جابكم ؟
نوف : جزاك الله خير تطمني علي بوقت ثاني مو يوم عرفتو ان انا ورفيقة عمري هنا قلتو بنخرب عليهم .
اسماء وهي مو حاسبه حساب اللي تقوله : والله اول كنتي عند اسامه مانشوفك إلا باليوم ربع ساعه .
سالت دموع نوف وتذكرت ايامها مع اسامه وطلعت تركض لغرفتها .
عبير : انتي اشلون تقولين كذا للبنت حرام عليك .
اسماء بصدمه : وانا اش قلت لها والله ماقلت شي .
عبير : لا تجيبون طاري اسامه عندها لابالزينه ولا بالشينه .
اسماء : والله مادريت انها كذا ع بالي عادي عندها .
العزوف : هي اساسا كذا من يوم طلقها اسامه ولا مره شفتها تسولف او تضحك .
سعاد : الله يعينها امي ماحزنت على اسامه كذا .
عبير : اذا كان اسامه موجود مصير الحي يتلاقى وراح يتلاقون مره ثانيه اذا الله كتب لهم عمر .
ووقفت عبير : عن اذنكم بروح لنوف .
طلعت عبير لغرفة نوف وطقت الباب ودخلت وشافت نوف تبكي وراحت لها وجلست جنب نوف ع السرير : نوف اش فيك ؟
نوف وهي تمسح دموعها : والله ما اقدر اخفي دمعتي اذا تذكرت ايامي معاه وهو ولا مره غاب عن بالي .
عبير : يله ياقلبي تعالي معاي بنجلس مع البنات والله ندمو انهم جو الحين ماحد ينكد عليك .
نوف : انا متنكده خلقه .
عبير : نوف خلاص ابتسمي الحياه بهجه .
نوف : والحياه هذي عندي حزن ويأس والله مو قادره اعيش زي اول وانا ما اشوف اسامه قدامي .
عبير : افرضي مارجع اسامه اش راح تسوين ؟
نوف : والله لأموت لو مايرجع .
عبير : اسم الله عليك .

**

**

**

ام وليد : والله تعبت يايمه بنتي قتلت نفسها انا ما ادري اش هالمصايب اللي تتحذف علينا من كل صوب .
ام عبدالعزيز : يابنتي والله اني انصدمت من بنتك بس انتم ضحكتو على نوف يوم تطلقت بلاكم ربي ان الله يمهل ولا يهمل .
ام وليد تذكرت نوف ومصيبتها : بس نوف طلاقها اهون بمليون مره من الانتحار اهون من انها تطلع مع ولد ماتعرفه .
ام عبدالعزيز : ياما نصحتك وقلتلك ليلى راح تضيع نفسها وتقولين هذي تربيتي وانا واثقه فيها .
ام وليد : اللي فيني مكفيني خلاص انا ندمت على دلعي لها .
ام عبدالعزيز : انتبهي لالماس لاتصير مثل اختها تراها امانه برقبتك لاتفرطين فيها .
ام وليد : ماراح اخليها تسوي اللي سوته اختها .
دخل وليد : سلام عليكم .
امه وجدته : عليكم السلام .
سلم وليد على راس جدته : هلا والله بالغاليه تو مانور البيت .
ام عبدالعزيز : بوجودك حبيبي .
وليد : يمه بنات خالتي هنا والماس مو موجوده .
ام وليد : وينها ؟
وليد : ما ادري والله .
ام وليد : اتصل على السايق شوف وينها .
اتصل وليد على السايق : الوو .. وين الماس .. اهااا يله ارجع بسرعه .
ام وليد : اش يقول وينها ؟
وليد : يقول رايحه لبيت عمي فهد .
ام وليد بعصبيه : اش تسوي هناك ؟
وليد : يمه السايق انسوه خلاص ماعاد فيه سايق ومشاويركم انا اوصلكم لها .
ام عبدالعزيز : كل الناس عندهم سايق بس البلا من التربيه .
وليد : يله يمه روحي لبنات خالتي .
قامت ام وليد وراحت الصاله ودخلت : سلام عليكم .
صبا وحلا : عليكم السلام .
ام وليد بعد ماسلمت عليهم : حيالله من جانا .
صبا : الله يحييك وين الماس ؟
ام وليد : راحت عند بنات عمها شوي وهي راجعه .. اش اخباركم ؟
صبا : الحمدلله بخير .. عظم الله اجرك خالتي .
ام وليد : اجرنا واجرك .
حلا : خالتي ماتدرين اش صار على عبدالله اللي يكلم ليلى .
طالعتها ام وليد : وانتي اش دراك ؟
حلا بخوف : بـ بس اذكر ان ليلى قالت لي انها تكلم واحد اسمه عبدالله انا ما اعرفه .
ام وليد : ماتعرفون عبدالله بس تعرفون غيره صح ؟
صبا : خالتي صحيح اننا نكلم شباب بس مانطلع معاهم هذا بس للتسليه .
ام وليد بعصبيه : اطلعو من بيتي انتم اللي خليتو بنتي تكلم شباب وتسوي حركاتكم يله اطلعو ولا عاد اشوفكم مره ثانيه .
صبا : خالتي احنا بنات خواتك تطردينا من بيتك لو عرفو امي وخالتي راح يزعلون عليك .
ام وليد : وانا مايهموني خواتي اهم شي الماس ماتـخلونها مثلكم يله اطلعو ولا عاد اشوفكم .
طلعو صبا و حلا من عند ام وليد وجلست على الكنبه وهي تبكي " حسبي الله عليهم "

**

**

**

صحت ام عبدالله الساعه 9 ونص الصباح وطلعت من غرفتها وراحت للمطبخ : سلام عليكم .
الخدامه : عليكم السلام .
ام عبدالله : سوي لي قهوه وشاهي وجيبيهم للمجلس .
الخدامه : اوك .
طلعت ام عبدالله للمجلس ودخلت : سلام عليكم .
مهند وماجد : عليكم السلام .
ام عبدالله : صبحكم الله بالخير .
ماجد : هلا والله بجدتي صباح النور تو مانور البيت .
جلست ام عبدالله بالارض : ليش ماصحيتوني الساعه 9 وانا توي اصحى .
مهند : جدتي ترا ما تأخرتي بنومك والله بدري .
ام عبدالله : انتم كم الساعه صاحين ؟
ماجد : الساعه 7 ونص وطلعنا مع جدي وتو رجعنا .
ام عبدالله : اول كنا نصحى من صلاة الفجر وماننام مو مثلنا الحين الله يعيننا على الزمن تغير .
مهند : جدتي اش رايك اليوم نكشت الارض ارتوت من المطر اللي البارح .
ام عبدالله : والله ما اقدر اروح واخلي بنت عمتكم وهي ماتحب الكشتات .
ماجد : مين بنت عمتي ؟
ام عبدالله : اسيل بنت عمتك سهام البارح جات هنا وبتدرس هنا ابوها بيروح بعثه لامريكا .
مهند : هي بأي صف ؟
ام عبدالله : بثالث ثانوي .
ماجد : انا ما اذكرها إلا يوم كانت عمتي هنا الله يرحمها .
رن جوال ماجد وطلع من الغرفه : الوو .
ام عامر : هلا حبيبي اش اخبارك ؟
ماجد : الحمدلله بخير .. اش اخباركم واخبار نوف ؟
ام عامر : الله يفرج همها نوف ماعادت بنتي اللي اعرفها .. إلا اش اخبار الامطار عندكم ؟
ماجد : الحمدلله جاتنا سيول من امس بعد صلاة الظهر الين الساعه 7 قبل شوي وهو مطر مايوقف .
ام عامر : مشاء الله .. معلقين الدراسه عندكم ؟
ماجد : على ما اعتقد انهم معلقينها .
ام عامر : اش اخبار جدتك ؟
ماجد : الحمدلله بخير .
ام عامر : ماجد اش رايك اخطب لك اسيل بنت عمتك ؟
ماجد : والله ما اعرف عنها اي شي وانا ما ابيها ببالي وحده ولازم اخذها .
ام عامر : ميـــن ؟
ماجد بابتسامه : كل شي بوقته حلو .
ام عامر : واذا انخطبت قبل لاتخطبها ؟
ماجد : مكتوب ومقدر غيرها مليون بنت .
ام عامر : هذا الشي الوحيد اللي استفدته من جدك .
ماجد : ياكثر استفادتي منه .
ام عامر : بعد اسبوعين ان شاء الله بنخطب لأخوك عامر وياليت تكون موجود .
ماجد : مشاء الله من بتخطبون له ؟
ام عامر : بنخطب له سعاد بنت عمك .
ماجد : طيب ليش ماتخطبون له اسيل ؟
ام عامر بضحكه : تطمن ماراح اخطب لك إلا اللي فبالك .
ماجد : يمه والله امزح ما ابي ولا وحده انا ابي طول عمري كذا عزوبي .
ام عامر : مو بكيفك بس ثلاث سنوات وازوجك لو غصب عنك .
ماجد : طيب خمس سنوات عشان انا ومهند يصير زواجنا بيوم واحد .
ام عامر : حاضر .. مع السلامه حبيبي .
ماجد : مع السلامه .

**

**

**

بالــــــمدرسه

العزوف : يله بنات مين اللي تروح تشري لنا .
جواهر : كل يوم انا اروح شوفي بنت عمك ولا مره راحت .
العزوف : ســوســو ياقلبي روحي اشري لنا .
سعاد بابتسامه : ماعاش من يرد لك طلب من عيوني .
وراحت للمقصف .
العزوف : فديت بنت عمي مــو مثلكم تقول لا .
جات سمر وضحكو البنات : العزوف شوفي مين اللي جاء .
العزوف : ياكرهي لها .. تكفون قولو لي اش اسوي معاها .
جات سمر وطالعة بالعزوف : صباح الخير .
العزوف : صباح النور .
سمر : ممكن تمشين معاي شوي ؟
العزوف : لا عندنا امتحان الحصه الرابعه وبذاكر الحين .
سمر : الله معاك ياقلبي .. بعطيك رقمي وبطلع معاك السوق العصر .
العزوف : بس انا ما عندي جوال ولا تليفون بالبيت وامي ما معاها جوال .
ضحكت جواهر وطالعتها سمر : مافيها شي على ايش تضحكين ؟
افراح : معقوله فيه ناس بالوقت هذا ماعندهم جوالات .
سمر : ايه معقوله ونص .. طيب العزوف الساعه 4 ونص العصر اطلعي للفيصليه .
العزوف : لا اش رايك نطلع لغرناطه ؟
سمر : اللي تامرين فيه .
العزوف : خلاص الساعه 4 ونص نتلاقى عن محل السبورات اوك ؟
سمر : اوك . ارسلت سمر بوسه للعزوف بالهوا ومشت من عندهم .
جواهر وهي تضحك : هذي اشلون صدقت انه ماعندكم جوالات ؟
العزوف : اهم شي انها ماتتصل علي ولاتزعجني .
جات سعاد واعطت العزوف اغراضها : اش كانت تبغى شينة الحلايا ؟
العزوف : تبي رقمي وتبيني اطلع معاها للسوق .
سعاد : اش قلتي لها ؟
العزوف : قلت لها انه ماعندي جوالات وبطلع معاها العصر لغرناطه .
سعاد : جــــد بتطلعين معاها ؟
العزوف : والله لو اني مجنونه ما اطلع معاها .

**

**

**

دخلت اسيل بغرفتها ونزلت عبايتها ومريولها ولبست بنطلون لونه سماوي وبلوزه بنص فخذها لونها ابيض وزهري صوف ولبست صندل لونه ابيض ونزلت تحت : جدتـــــــي .
طلعة لها جدتها وطالعتها بذهول : انتي اش لابسه واشلون تطلعين كذا يعني ماتدرين ان فيه عيال خوالك هنا ؟
اسيل : جدتي والله نسيت انه فيه عيال هنا وانا تو طلعت من المدرسه وما عرف عيال خوالي متى يجون هنا .
ام عبدالله : هم اربعه وعشرين ساعه هنا يله روحي لحجرتك .
مهند : جـدتي عندك احد .
راحت اسيل تركض للغرفه وطلعت ام عبدالله لمهند : هلا حبيبي .
مهند : جدتي مين اللي انتي تكلمين معاه ؟
ام عبدالله : انت اش فيك تنسى اسيل بنت عمتك اللي كانت هنا .
مهند " مشاء الله عليها جمال ودلال " : طيب انا وماجد بنطلع يمكن مانرجع إلا بكره .
ام عبدالله : وين بتروحون ؟
مهند بهمس : جدتي البنت لازم تاخذ راحتها ما يصير نجلس هنا على قلبها كلها كم اسبوع وهي راجعه عند اهلها .
ام عبدالله : الله يجزاكم خير والبنت ماخذه راحتها .
مهند : لا مو ماخذه راحتها واحنا بننام بالمزرعه يمكن ثلاث ايام او اربعه واحنا راجعين .
ام عبدالله : بتنامون بالمزرعه بالجو هذا برد والله محد يقدر ينام بالمزرعه .
باس مهند راس جدته : احنا بنمشي مع السلامه .
ام عبدالله : الله يحفظكم ويخليكم لي .
مشى مهند من عندها وراحت ام عبدالله لغرفة اسيل طقة الباب ودخلت : سلام عليكم .
وقفت اسيل وباست راس جدتها : هلا جدتي عليكم السلام .
ام عبدالله : حبيبتي لاتشيلين بخاطرك علي انا والله اخانقتس لمصلحتس .
اسيل : اش دعوه جدتي ازعل عليك عشانك قلت لي روحي غرفتك لا عادي مو زعلانه .
ام عبدالله : الله لايحرمني منك .

**

**

صحى اسامه من نومه " اللهم اجعله خير " طالع بالساعه 6 ونص الصباح واخذ له شور ولبس بنطلون اسود وبلوزه رسمي ابيض وجاكيت اسود وطلع يمشي بالشارع وكل تفكيره بنوف " آآآآه اشتقت لك يانوف ياليت الزمن يرجع "
كانت تمشي وراه بنت فرنسيه وضربته مع كتفه بخفه : Bon jour . ( صباح الخير )
طالعها اسامه : بنجور .
البنت : Toi Beau Tré bien merci .. Moi n'aime pas . ( انت جميل جدآ وانا احبك )
اسامه مشى من عندها " ناقصها انا تجي وتقولي احبك صدق وقاحه "
جلس اسامه على الكرسي وطالع بالناس اللي تمشي والنشاط بدأ في المانيا الساعه 6 صباحآ وهذي احد عادات دول اوروباء اللي محد يتخلف عنها " ياربي تيسر امري وتعينني على الدنيا وقسوتها ياااارب اموت وافتك وارتاح من المشاكل "
رن جوال اسامه : الوو .
متعب : هلا والله بصديقي هلا باغلى انسان على قلبي .
ابتسم اسامه واول مره يبتسم من اسبوعين واكثر : هلا والله بالغالي .. هاا اش اخبار اهلي واش صار عليهم ؟
متعب : الحمدلله كلهم بخير وانا سألت امي عن نوف وتقول على حالتها بس انها اول ماتأكل والحين بدت تاكل شوي شوي وكذا الين ترجع لحالتها الطبيعيه .. إلا انت اش اخبارك واش اخبار الجو عندك ؟
تنهد اسامه : فديت السعوديه وترابها الحين برد موت ما نقدر نتحرك لا والحين الصباح والناس كلهم رايحين لدواماتهم بس على صغر المانيا سكانها كثار وين السر ما ادري .
متعب : ما اشتقتلنا يا اسامه .
اسامه بغصه : باليوم اموت الف مره بس اسمع بأسم السعوديه ودي اروح لها .
متعب : اش اللي يمنعك تعال تكفى ارجع لأهلك ولصاحبك اللي ينتظرك .
اسامه : خلاص انا مالي رجعه ماجيت لألمانيا وانا برجع .
متعب : انا زواجي بعد سنه يعني اشلون ماتحضره ؟
اسامه : والله ياليت احضره س ما اقدر اعذرني وهو زواج اختي يعني كلكم غالين بس ان شاء الله تعذروني .
متعب : معذور ياصاحبي بس انا ما تعودت على الحياه بدونك انت دايم عندي واشكي همومي عليك الحين ماعندي احد .. احس اني فقدتك وانا اكلمك يوميآ واتواصل معاك بس امك ونوف اش بيسوون وهم مايعرفون عنك شي .
اسامه : صدقني كلها كم شهر وهم ناسيني دايم الميت شهر شهرين واهله ناسينه وانا يعتبروني ميت لأن مالي رجعه لهم .
متعب : والله لو تشوف حالة اهلك ترجع ابوك وعمامك يدورون عليك بكل مكان ويقولون لي لو تعرف عنه اي شي بلغنا وانا اعرف عنك كل شي وما اقدر اقولهم .
اسامه : متعب لاتقول لأحد انك تعرف انا وين الى اذا ربي اخذ امانته .
متعب : اســـامه لو تتزوج نوف اش راح تسوي ؟
اسامه بخوف : لا ان شاء الله ماتتزوج ومايخذها احد غيري .
متعب : طيب ليش تطلقها وانت ماتبيها تتزوج غيرك ؟
اسامه : انا ابيها تبعد عني وماتعرف اش الضروف اللي صارت لي وما ابيها تعرف اي شي عني بس ما ابيها تتزوج .
متعب : انت طلقتها وخلاص يعني ليش ماتبيها تتزوج شي طبيعي انها تتزوج .
اسامه : الله يسامحك يامتعب والله دخلت فيني خوف مو طبيعي بس تكـــــفى اذا تزوجت نوف بلغني .
متعب : من عيوني الثنتين راح اقولك عن اخبار نوف اول بأول .
اسامه : يعطيك العافيه وهذا العشم فيك .
متعب : الله يعافيك .

**

**

**

دخل ابو عامر بالبيت : سلام عليكم .
الكل : عليكم السلام .
جات العزوف وسلمت على راس ابوها : الله يرضى عليك يابنتي .
ام عامر : العزوف روحي خلي نوف تجي .
العزوف : يمه والله عارفه بتقول لا .
ام عامر : خليها تتغدى معانا ولامره تغدت معانا .
العزوف : اوك بروح بس انا ما ودي اكدر خاطرها بشي .
ام عامر : يله الله يخليك لي روحي نادي اختك تتغدى معانا .
راحت العزوف لغرفة نوف وطقت الباب ودخلت وشافت نوف حاضنه صورة اسامه وتبكي : نوف تقول امي تعالي تغدي .
نوف : مـــابي غدا .
نزلت العزوف تحت : يمه تقول ماتبي غدا .
دخل عامر : ســـلام عليكم .
الكل : عليكم الســــلام .
جلس عامر على الكنبه وطالع العزوف : مشاء الله اليوم طالعه من المدرسه بدري اش اللي صار ؟
العزوف : كل يوم اطلع مع الباص واليوم طلعت مع السايق انا وسعاد بنت عمي .
عامر : ياما حذرناكم وقلنا لكم لاتطلعون مع السايق بس شكلكم ماتفهمون .
ابو عامر بعصبيه : عااامر مالك فيهم دخل والعزوف معاها سعاد مو بروحها .
عامر : يبه عارف بس كلهم بنات والسايق مو ثقه .
ام عامر : والله بعد اللي صار لبنت عمكم مانبيكم تطلعون مع السايق اخوانكم مافيهم شي يقدرون يوصلونكم للمدرسه واحنا مو بحاجة السايق .
العزوف : يمه لاتصير عقده حركة ليلى والله لو ايش ما اسوي اللي هي سوته واذا انا مو قد الثقه هذا شي ثاني .
عامر : صح انك متربيه واحسن تربيه واتوقع سعاد ماتقل عنك بالتربيه عكس ليلى بس الحذر واجب .
ابو عامر : انا واثـــق فيك يابنتي وعادي تطلعين مع السايق بس لازم يصير معك احد .
العزوف : فديتك بابا ما فيه احد واقف بصفي إلا انت .
ابو عامر : انتي اخر العنقود ومانقدر نرفض لك طلب .
العزوف : خلاص انا وسعاد مانبي الباص والله طفشنا وزحمه وقلق كل يوم .
عامر : طيب اش الحل ؟
العزوف : فيه سايق .
عامر : بس مايصير تروحون مع السايق .
العزوف بعصبيه : انت اش فيك ترا بس بنروح للمدرسه ونرجع ماراح نروح لديسكو او مقاهي .
طالعها عامر ووقف : لاترفعين صوتك علي انا اخوك واكبر منك .
ابو عامر : انتم ماتحترمون احد انا بينكم احترموني .
راحت العزوف لغرفتها وعامر طالع امه : يمه شفتي نتايج دلعكم لها .
ام عامر : حرام عليك والله مو دلوعه بس ماتبي تكبر الموضوع ماتبي ابوك يمد يده عليك .
طالع عامر بابوه : يمه يعني بتمد يدك علي عشانها .
ابو عامر : كلكم عيالي وانا اعدل بينكم الرسول صلى الله عليه وسلم قال (( ساوو بين ابنائكم )) .
عامر : بس اللي اشوفه انكم ماتساوون بيننا .
ام عامر بابتسامه : تغار من العزوف ياعامر ؟
عامر : لا والله ما اغار منها بس انا ونوف محكورين ولا ماجد والعزوف اللي يبون يسوونه .
ابو عامر : انت ولدي الكبير يدي اليمين ما اقدر استغني عنك والله انك عندي اغلى من الدنيا ومافيها .

**

**

**

الماس : يمه حرام عليك ليش تطردينهم والله مايستاهلون لهم يوم من طردتيهم ما اتصلو علي ولا جو هنا .
ام وليد : هم ضيعو اختك ما ابيهم يضيعونك يكفي اختك الله يرحمها .
الماس : بس يمه هذولا بنات خالاتي وما اقدر اعيش بدونهم انا تعودت عليهم من صغري .
ام وليد : وانا ما ابيك تروحين معاهم لأني اكرهم انتي شفتس خالاتك بالعزاء والله ولا كأن الميته تقرب لهم كاشخات وزوجات عمامك صارو احسن منهم اللي طول عمري اكرهم بس فعلآ هم ناس طيبين .
الماس : مــامي والله لازم اروح عندهم واستسمح منهم هذولا صبا وحلا .
ام وليد : والتراب واذا كان صبا وحلا ؟
الماس : يمه اش غيرك كنتي تكرهين عمامي وزوجاتهم وعيالهم اش اللي غير كل هذا فيك ؟
ام وليد : وفاة بنتي غيرت كل شي فيني وانا ما زلت اكره عمامك وعيالهم ولا راح تغير وجهة نظري فيهم .
رن جوال الماس وابتسمت : يمه هذ صبا اتصلت علي .
ام وليد : ردي عليها بس ماتطلعين معاها فاهمه .
الماس : الوو .
صبا : هلا والله ببنت خالتي اخبارك قلبو ؟
الماس : تمام اخبارك والله وحشتيني .
صبا : وانتي وحشتيني موووت اشتقنا لك بس خالتي الله يسامحها طردتنا من البيت .
الماس : والله انا متضايقه من الشي هذا .
صبا : لا قلبو عادي بس ولا يهمك راح تشوفيننا كــل يوم وبنرجع انا وحلا للجامعه عشانك .
الماس : فديتكم يابنات خالتي وامي ماراح تزعل عليكم وبــتعــذر منكم وانـــــا متأكده .
صبا : يااااليت ونرجع زي قبل واحسن .
الماس : امس رحت عند نوف بنت عمي والله قهرتني جد لسه تبكي على اسامه ومو مهتمه لكلام الناس .
صبا : شكلها تحبه حيل .
الماس : تموت عليه وهذا اللي قاهرني هو يحبها ولا مره عبرني من صغرهم ويوم طلقها اختفى يعني هذا اكبر دليل انه يحبها .
صبا : ياشاطره لو يحبها كـــان ماطلقها .
الماس : اش دراك عن ظروفهم ؟
صبا : هذا شي اكيد اي واحد يحب زوجته مستحيل يطلقها .
الماس : والله قطعت قلبي نوف تغيرت وجهة نظري فيها .
صبا : المااااس انا ما ابيك كذا ابي قلبك حجر ماتحسين بأحد ولا ترا كذا بزعل عليك .
ابتسمت الماس : كل شي ولا زعلك ياقلبي .

**

**

**
بـــعد مـــــرور شهريـــــــــن

كانت نوف بغرفتها جالسه ع السرير ومعاها صور اسامه " ليـــــش خليتني ؟"
تذكرت اخر ليله مع اسامه كان جالس ع الاريكه دخلت نوف وجلست جنبه : اسامه .
اسامه بابتسامه : هلا حبي .
نوف : اش فيك اش مكدر خاطرك ؟
اسامه : هااا لا مافي شي بس اني متضايق شوي من الشغل .
نوف : حبيبي اش حادك على شغلك شوف شركة عمامي .
اسامه : حبيبتي لاتشيلين همي .. ولا ابيك تزعلين مني .
باست نوف خده : مستحيل ازعل عليك وعلى ايش ازعل من زواجنا مازعلتني بشي .
اسامه بغصه : طيب سامحيني وصدقيني لو بنتفرق حبك يبقى بقلبي والله ما حبيت ولا راح احب مثلك .
نوف باستغراب : اسامه انت اش قاعد تقول الله لايفرقنا .
اسامه وهو يحضن نوف : والله مايفرقنا إلا القدر وانتي تبقين بقلبي لو احنا بعيدين عن بعض .
سالت دموع نوف : تـكفى لاعاد تجيب طاري الفراق والله خوفتني .
اسامه وهو يمسح دموعها : ياقلبي انا حاس انا بنتفرق بس اعرفي انه القدر واذا كان تحبيني لاتكدرين خاطرك بشي ترا الدنيا ماتسوى .
نوف : طيب اش الي بيفرقنا انا ماراح ازعل عليك ولا راح اكرهك وانت قلتها انا حبك الاول والاخير اش اللي يفرقنا .
اسامه : القدر اللي يفرقنا .
رجعت نوف لواقعها ومسحت دموعها " يعني اش الظروف اللي خلتك تطلقني "
رن جوال نوف وشافته هو نفس الرقم اللي يتصل عليها لما كانت بالمستشفى وردت بــ: الوو .
كان اسامه يسمع لها بانصات ونفسه يكلمها بس يخاف يفضح امره .
نوف : الوو .. انت مين ؟
اسامه : ............
قفلت نوف الخط ونزلت جوالها ع السرير ووقفت وفتحت الدريشه وطالعت بالاشجار وسمعت صوت العصافير والشمس مختفيه بالغيوم " ياحلاة الجو "
طق الباب ودخلت ام عامر : سلام عليكم .
نوف : عليكم السلام .. صباح الخير .
ام عامر : صباح النور والسرور .. يمه تعالي افطري معاي اخوانك نايمين .
نوف : لا يمه ما ابي فطور والله مالي نفس بالاكل .
ام عامر : نوف حبيبتي فيك شي ؟
نوف هزت راسها بلا : مافيني شي .. بس اسامه طول غيابه .
ام عامر :للحين تنتظرينه ؟
نوف : الين اموت وانا انتظره .
ام عامر : يابعد عمري يانوف والله عذبتي نفسك واسامه خلاص نساك ومستحيل يرجع له شهرين ماندري وينه .
نوف بغصه : يمه لاتحطمون املي انا متوقعه انه بيرجع لي وقريب ان شاء الله .
ام عامر : يارب انه يرجع حالتك بين فتره وفتره وهي متدهوره اكثر .
نوف : يمه من الهم اللي بقلبي همي كبير وجروحي لسه تنزف من طلاقي .
ام عامر : باقي شهرين وتكمل عدتك وولد خالتك بيخطبك رسمي .
نوف : وانا قلت لك يايمه ما ابيه ومستحيل اتزوج بعد اسامه .
ام عامر : لا جا وقته نتناقش .