[عادل سلامة]

بفكر أسافر من مدة لكن حاجات كتير كانت بتعطلني، لحد ما قررت إني أزور تركيا، ودا أجمل حاجة حصلتلي السنه دي، بعد تجهيزات السفر والوصول لتركيا حسيت قد إيه دي دوله فيها طعم مختلف للرفاهية والمتعة، تحس إنك في أوروبا جدا، وفي نفس الوقت الطعم الشرقي والاسلامي موجود بشكل جميل ودا سر عبقرية تركيا ونهضتها.

بالليل تلاقي أذان العشا شغال، وبنت جميلة على قهوة قريبة بتعزف حاجه لجلال الدين الرومي، عشان كده اول مكان فكرت أزوره كان مسجد السلطان سليمان القانوني، بيسموه هنا جامع السليمانية، حاجة فوق التحفة في المعمار وتوزيع الضوء وطريقة البناء، تحس بالرهبة والمتعة في مكان زي المكان ده، بعد ما أخدت جولة حسيت إني عاوز كل صورة شفتها تنطبع جوايا، كأنها ذكرى ما تتنسيش.

طلعت بره الجامع وقلت أتمشى، نسيت أقول إني الجو كان صيف و تركيا بالصيف جميلة وبالشتا أجمل، فيها أشهر الآثار المسيحية وأشهر الآثار الاسلامية، خلطة جميلة من طعم الحضارة، حسيت لمل دخلت بازار إسطنبول إنه متحف من جمال الحاجة المعروضة، لدرجة إني أخدت فترة قبل ما أشترى حاجة من جمال المكان وروعته.



نسيت الأكل، الأكل في تركيا متعة بجد، تحس بالطعم الشرقي بنكهة أوروبا غير إنهم فعلا أفضل ناس تعمل لحم مشوي في العالم، عندهم الكباب التركي بيتحط غي جردل نحاس وبعدها بيدخل فرن على بُعد متر ونص تحت الأرض ويتغطى المكان كويس، لدرجة أنهم بيقفلوه بالإسمنت وبعدها تيجي الريحة تحسسك بالشبع بجد.

تركيا تحس فيها بأنك ابن المكان من طعمها الشرقي ولبس الناس وجمال الستات، تدخل قلبك قوي انك تحس بالود من الناس في وسطهم الابتسامة طالعة من القلب، لانهم بيحبوا العرب فعلا وجذورنا واحدة من العادات والأكل والشرب، بالمناسبة تركيا فيها أفضل بيرة في العالم تحس بطعم مختلف، مع الأكل الشرقي والكلام نفسه فيه الفاظ عربية تحسسك أنك في مكان محتاج تشوف زيه في بلادك وترحب بكل الناس من كل مكان في الدنيا، تشوف بجد قد إيه الانسان واحد في كل مكان.