رحلتي إلى .. الكروز النرويجي الإسطوري

[اميرة عبد الدايم]

أهلا بالجميع وكل عام وأنتم بخير عساه ينعاد علينا وعليكم بالخير وتقبل الله صالح أعمالكم في الشهر الكريم .


أتوقع الشهر الجاي هو موسم السفريات للعالم خصوصاً للي مرتبطين بالدراسة .. يمكن تأخرت شوي وخلصتوا حجوزاتكم لكن مايمنع يكون هالموضوع مرجع لكم مستقبلاً لو حبيتوا تخوضون التجربة اللي بأكتب عنها اليوم .


بأكتوبر الماضي حبينا نجرب رحلات الكروز وبصراحة مالقيت محتوى عربي كافي عن الكروزات هذي .. يعني أسمع إنها مملة وماتناسب العوائل .. خالي سبق وجربها فسألته بالتفصيل عن التجربة معه وكيف كانت .. ونصحني مره فيها .. بأكتب لكم تفاصيل تجربتي بين الأسئلة القادمة .


ماهي رحلات الكروز ؟

هي رحلات بحرية في باخرات ضخمة تتنقل بين أكثر من مدينة ودولة .. قد تستغرق الرحلة أيام وقد تستغرق شهور .. والرحلات هذي أنواع وأشكال لها شركات متعددة ومتنوعة .. فيه شي مخصص لاستجمام رجال الأعمال اللي يتعرفون على بعض ويعقدون صفقات وكذا .. شي مخصص للمرضى اللي يحتاجون نقاهه .. وشي للأطفال وشي عام ماله توجه معين .


أي كروز أختار ؟

زي ماقلت لكم فيه كروزات مره حلوة ومعروفة ودايم تعتبر من الخمس الأوائل .. راح أختصرها لكم بنوعين يمدحونها مره الرويال كاريبيان كروز .. والنرويجيان

كنت أبغى الرويال كاريبيان لكن توقيت الرحلات ماكانت مناسبة لإجازتي .. فاخترت النرويجيان

تدخلون ع الموقع الخاص فيهم وتختارون أي جزء من أي قارة تبغونها وأي شهر وكم يوم تبغونها ويطلع لكم مسار الرحلة ووين ينطلق الكروز ووين يوقف وسعره .. فيه رحلات بالشرق الأوسط تنطلق من دبي وتمر على عمان وكذا

كنّا حابين نروح لبرشلونة وننطلق من هناك .. فخط الرحلة اللي كان مناسب هو كالآتي : برشلونه-نابولي-روما-فلورينس-كان-بالما-برشلونة .. كان يتنقل بين اسبانيا وايطاليا وفرنسا ..

Epic ونوع الباخرة كانت


كابينة كروز ع البحر مو زي غرفة في فندق ع الأرض !

أذكر خالي قالي احجزوا سويت مع بلكونة.. بس ماكان متوفر إلا ميني سويت مع بلكونة في طرف الباخرة من الخلف

ليه غرفة الفندق مو زي غرفة الكروز .. يعني لاتنصدمون مثلي الغرفة مره مره مره صغيرة حتى وهي يقالك ميني سويت

طبعاً فيه غرف في منتصف الباخرة ماتطل على شي .. مناسبة للي عندهم دوار البحر ولا يهمهم مكان الجلوس لأنهم بس بينامون فيها ويصحون وينطلقون بعدها ..

فيه غرف مطلة ع البحر مع بلكونات .. للي يحبون يجلسون مع الذات بهدوء وخصوصية

وفيه سويت أكبر شوي غرفة الجلوس منفصلة عن غرفة النوم وبلكونة مطله ع البحر بسعر أغلى

اختيارك يعتمد عليك وعلى تفضيلك .. وميزانيتك ..



كيف أستعد للرحلة وكيف طريقتها ؟

أول شي حط ببالك إن الكروز يبحر ١٢ ساعة متواصلة فتنقطع الشبكة .. عشان تتواصل مع أهلك اللي بالكروز في تطبيق خاص مثل الواتز اب

وأعتقد كان فيه مكان للكمبيوترات والانترنت لو تحتاجون الإنترنت ممكن تدفعون وتستخدمونه

وحط ببالك بعد إن الكروز يوقف في المدينة الوحدة ١٢ ساعة تقدرون تنزلون وتستكشفون المدينة بنفسكم ولو تأخرتوا ترى الباخرة بتحرك عنكم 😛

أنصح إنكم تقرون عن المدن اللي ماتعرفونها مره وتعرفون وش الأشياء اللي ماتتفوت ولازم تمرون عليها .. وتتمشون فيها بنفسكم .. عندكم خيار ثاني إنكم تطلعون كرحلة مع حقين الكروز طبعاً يدفعونكم زيادة .

جربنا مره في كان بفرنسا مع التور كان ٤ ساعات والساعات الباقين أنت حُر تكمل تمشيه أو ترجع للكروز .. في هالأربع ساعات ودونا لأماكن مو من اهتمامي صراحة .. رحنا كنيسة وكذا .. مدري أنا ماتشدني مره لكن غصب أمشي معهم ..

والمره الثانية جربنا التور في نابولي بايطاليا كل اليوم مشي مع التور مع وجبه غدا ب ٥٠٠ ريال الشخص مره تكسرت رجولنا من المشي .. صح ودونا للأماكن التقليدية وشفنا أماكن حلوة مطلة ع البحر.. لكن حتى لو عجبنا شي مايمدينا نتكي فيه مشي سريع سريع بدون مزمزه وتقهوي وكذا ههههههه

فقررنا إننا مانتقيد بالتور وحنا على كيفنا ندور .. سوينا هالحركة بروما .. وأخذا باص سياحي فر فينا على أبرز الأماكن وبعدين اخترنا مكان جلسنا فيه تسوقنا وتغدينا ورجعنا المغرب للباص ستيشن إللي يودي للكروز

أنا ماعجبني التور المقيد .. خالي بالعكس استمتع فيه .. يعني أنت ومزاجك




الكروز يبحر ١٢ ساعة ماتطفش ؟

تخيل إن قرية كاملة تمشي بالبحر سبحان الله .. تنام في فندق كل يوم بمدينة شي لايمل صراحة غير كذا بأقولكم وش الأشياء الموجودة على سطح الكروز ..

مسارح واستعراضات وسيرك لازم تحجزون لها عاد هم موضحين لكم طريقة الحجز .. طبعاً فيه منها شي شامل تذكرتك وتدخله بدون فلوس وفيه شي لا لازم تدفع عليه

فيه بوفيه انترناشونال ضخم جداً بأتكلم عنه بالتفصيل بعد شوي .. غير المطاعم والمقاهي .. ومسابح وألعاب مائية حلوة للأطفال .. سينما كل ليلة يعرضون أفلام تحت ضوء القمر والباخرة تبحر ومسرح يتسع للجميع بدون حجز

فديو جيمز وشنطرنج وكرة قدم وسلة وذي الألعاب مفتوحة للجميع .. صالون وسبا يحتاج تدفع زيادة

طبعاً بشاشة التلفزيون اللي بالغرفة فيها جدول بالنشاطات الموجودة في سطح الكروز وفيه فرق عالمية زي بلو مان اللي بلاس فيجاس وكذا عروضهم مجاناً شاملة التذكرة

هذا اللي جا على بالي لحد الآن ..



الأكل في الكروز ؟

هذا صراحة أجمل فقرة ههههه .. طبعاً الكروز مليان مقاهي ومطاعم بفلوس .. وفيه بوفيه ضخم جداً جداً مفتوح للجميع لأنه شامل التذكرة .. صراحة توقعت إنه أي كلام عشان يجبرون الناس يتوزعون بالمطاعم الثانية ويصرفون فلوس

لكن أبداً بوفيه كامل متكامل اسمه ذا قاردن .. يكفي الجميع ومنوع .. يبدآ الصباح قبل ماينزلون الناس لميناء المدينة اللي وقفوا عندها .. ويسكر ١١ الليل لكن الداينج ان ٢٤ ساعة على بعض الأطباق .. يعني ممكن أطلب دايننج إن الساعة ٣ الفجر كابتشينو وتشيزكيك .. مجاناً .. موب مجاناً بس مشمول خلاص بالتذكرة

وفيه شي لطيف إسمه البيتزا نوصلنا لك دليفري بالبحر هههههه ب ٥ دولار وكبيرة مررره أي وقت تجيك ..

الغدا عالمي كل شي ممكن تلقاه .. وبعد العصر تلقاهم مسوين هوت دوق وباستا وبرجر ومكاين الأيسكريم والحلويات والقهوة والشاي ٢٤ ساعة وموجودة ع المسبح وجوا بعد .. والعشاء كل ليلة لهم ثيم معين .. يعني مره أكل هندي مره شرق اوسطي .. مره ايطالي .. مره بحري .. وأتذكر كل صباح لما ننزل نفطر فيه فلبينية ترحب فينا وتقول لاتنسون ترى الليلية عندنا سي فود مثلاً .. وهكزا

تصلح للعوئل ؟

الناس كان قلقهم ع المسابح .. لكن ثلاث ارباعه أطفال .. وعشره بالميه كبار بالسن .. وخمسة بالمية شباب .. المناظر عادية جداً زي أي منتجع .. بالعكس أشوف الأطفال مره بينبسطون بالكروز+ فيه عروض مخصصة للأطفال ..

وإذا مره الرحلة كانت للأطفال بشكل أساسي جربوا تطلعون على ديزني كروز ..



بنمر أكثر من دولة ؟ طيب الفيزا ؟

الفيزا تطلعونها للبلد اللي بينطلق منه الكروز .. وبياخذون جوازاتكم أصلاً ويسلمونها لكم نهاية الرحلة .. مافيه أي تدقيق جمركي في التنقلات .. حنا الفيزا كانت شنقن اسبانيا

دوار البحر ؟

اممم بيوم ما جتنا عاصفة والباخرة كانت تتمايل .. وحسينا بغثيان وتعب خفيف .. لكن هالأزمة مااستمرت ساعة يمكن لو أنتم حساسين وعندكم دوار البحر تتعبون شوي ..


التكاليف ..

الأسعار تفرق من موسم لموسم .. صيف أو شتاء .. وكل ما تأخرتوا بالحجز كل ماغلا السعر .. عشان تحسبون التكاليف ادخلوا روابط رحلات الكروز اللي حطيتها لكم واختاروا رحلة وشوفوا سعرها للشخص واحسبوا حساب ٣٠ بالمية زيادة مصاريف بتطلع من هنا وهناك بالكروز ..


باختصار ..

الكروز تجربة جميلة ومغامرة ولكن برفاهية .. بعيد عن التقنية وزحمتها .. ولاتنسون إن ١٢ ساعة ماتكفي للمدينة عشان تحللونها لكن اعتبروها تمشية سريعة ومرور سريع على أبرز الأماكن فيها .. المتعة الحقيقة كانت بالكروز .. جانا يوم مانزلنا منه من الترفيه اللي لقيناه فيه ..


السؤال الذهبي .. هل راح أكرر التجربة ؟

أتمنى ذلك .. لكن في مكان غريب وجديد .. يارب

وبس والله .. يمكن الصور شوي قليلة لأني ماكنت مخططه أسوي تقرير عنها لقيت إن أغلب الصور خاصة .. لو عندكم سؤال أو استفسار لاتترددون تكتبونه لي