[اميرة عبد الدايم]

البـيـــــــض ماهن على شفّي
والحــــــب ينزف من اشواقه

جـــــــــرح الهوى يلهزه كفّي
وظنون الاجــــــــــــواد بوّاقه

والحـــــــــــــظ قاصر ومكتفّي
وغصن الأمــل يبْست اوراقه

والشرح مرفــــوض مصطفّي
قدامـــــــــــــــه الجهْل شنّاقه

ماني بغـــــــــــــــادي ومختفّي
وروحي على الكـــود مخناقة

ياللي مع الغـــــــــصب متلفّي
ومـــــــــــــــزيفٍ للرضا باقة

مشيوف ماهـــــــــــو بمتخفّي
وخــــــــــواطر الناس شعّاقة

صـــــــديت / وان جيتك مقفّي
ادرى الزعـــل واتبع الساقة

والشــــــــور ما صفّه بصفّي
مجناه من خـــــــان باشواقه

يكفيني الوجــــــــــــــد ويكفّي
بوحٍ سوى الشمس باشراقه

جفني للاحــــــــــلام ما رفّي
والزرع يحييه خــــــــــــلّاقه