جـــــــــــــروحــــي..

[فارس]

لك اشواقي من اول فقد لآخر جرح بغيابك
لك ذبولي وضيم الشعر لآمن شقّ لك ثوبه

لك امطار العتاب اللي وقف ملهوف في بابك
ولاحسيت ولا حنيت ولا تعطيه مطلوبه

لك جروحي حمام البوح وسط الروح غنى بك
لك سنين البعاد اللي بدونك غير محسوبة

لك الله يابعد قلبي وهو من ذنوبك ماتابك
ملكته يوم ذاك العهد صرت الذنب والتوبة

وسرّيته على مسراك وعرّجته على ركابك
ذبح لاجلك شرايينه وكرّت سبحة ذنوبه

خذيت النبض من صدري وغبت فزحمة اسبابك
ويتمت انتظاراتي وليل الحب ودروبه

هذاك اللي حضن قلبك وطنك وصفوة احبابك
سليت وما سلا والبعد ناره تنهش جنوبه

هذاك اللي تنفسّه غلا واسكنه اهدابك
هذاك اللي تواريخه بحبر الدم مكتوبة

دخيل النبض في عروقك دخيل دموع محرابك
دخيل الوجد ياروحي تعال احضنه بعيوبه